निर्वाचन आयोगद्वारा अन्तिम मतदाता नामावली सार्वजनिक

काठमान्डु । निर्वाचन आयोगले प्रतिनिधिसभा सदस्य निर्वाचनका लागि अन्तिम मतदाता नामावली प्रकाशन गरेको छ । आयोगले शनिबार मतदाता नामावली ऐन, २०७३ को दफा २० अनुसार अन्तिम सूची सार्वजनिक गरेको हो ।

आयोगका अनुसार प्रकाशित अन्तिम मतदाता नामावलीमा कुल १ करोड ८९ लाख ३ हजार ६८९ मतदाता समावेश छन् । तीमध्ये ९६ लाख ६३ हजार ३५८ पुरुष, ९२ लाख ४० हजार १३१ महिला र २०० जना अन्य मतदाता रहेका छन् ।

मतदाता नामावली ऐन, २०७३ तथा मतदाता नामावली अद्यावधिक कार्यविधि, २०८१ मा तोकिएको प्रक्रिया पूरा गरी नामावली तयार गरिएको आयोगले जनाएको छ । यस क्रममा २०८२ फागुन २० गतेसम्म १८ वर्ष पूरा हुने नागरिकहरूको विवरण अद्यावधिक गरी अन्तिम सूची प्रकाशन गरिएको हो ।

सम्बन्धित मतदाताले आफ्नो नामावली विवरण अनलाइनमार्फत पनि हेर्न सक्नेछन् । अन्तिम मतदाता नामावली आयोगको आधिकारिक वेबसाइट www.election.gov.np मा उपलब्ध गराइएको आयोगले जानकारी दिएको छ ।