उच्च अदालतको आदेशपछि लामिछाने आज रिहा हुँदै

काठमान्डु । सहकारी ठगी प्रकरणमा थुनामा रहेका राष्ट्रिय स्वतन्त्र पार्टी (रास्वपा) का सभापति रवि लामिछाने आज रिहा हुने भएका छन् । उच्च अदालत तुल्सीपुरको बुटवल इजलासले धरौटीमा रिहा गर्न आदेश दिएपछि उनी कारागारमुक्त हुन लागेका हुन् ।

ललितपुरस्थित नख्खु कारागारमा रहेका लामिछानेलाई जिल्ला अदालत रुपन्देहीबाट आवश्यक कागजात प्राप्त भएपछि मात्रै औपचारिक रूपमा रिहा गरिने कारागार प्रशासनले जनाएको छ । यसका लागि उनी आज भैरहवा पुग्ने कार्यक्रम रहेको छ ।

उच्च अदालतले लामिछानेलाई दुई करोड ६८ लाख रुपैयाँ धरौटीमा थुनामुक्त गर्न आदेश दिएको थियो । अदालतले बुझाइएको धरौटी रकम स्वीकार गरेपछि रिहाइको प्रक्रिया अघि बढेको हो ।

रवि लामिछाने छुट्ने खबर फैलिएसँगै बिहीबार नख्खु कारागार परिसरमा समर्थक र शुभेच्छुकको ठूलो भीड देखिएको थियो । भीडले कारागार क्षेत्र केही समय तनावग्रस्तसमेत बनेको थियो ।

रिहाइपछि लामिछानेले के प्रतिक्रिया दिनेछन् र राजनीतिक गतिविधि कसरी अघि बढाउनेछन् भन्ने विषयमा चासो बढेको छ । पार्टीका नेताहरूले भने अदालतको आदेशलाई सम्मान गर्दै कानुनी प्रक्रियामा विश्वास रहेको प्रतिक्रिया दिएका छन् ।