अवैध ‘म्यारिज ब्युरो’ सञ्चालन गर्दै आएका चिनियाँ नागरिक पक्राउ

काठमाडौं । व्यावसायिक भिसामा बसेर अवैध रूपमा ‘म्यारिज ब्युरो’ सञ्चालन गरेको आरोपमा चार जना चिनियाँ नागरिकलाई अध्यागमन विभागको टोलीले काठमाडौंको सोह्रखुट्टे, मिलीजुली चोक क्षेत्रबाट पक्राउ गरेको छ । पक्राउ परेकामध्ये एक महिला र तीन पुरुष रहेका छन् ।

अध्यागमन विभागका निर्देशक टीकाराम ढकालका अनुसार उनीहरूले व्यावसायिक भिसामा रहँदै आर्थिक रूपमा कमजोर नेपाली युवतीहरूलाई चिनियाँ पुरुषहरूसँग विवाह गराउने गतिविधि सञ्चालन गरेका थिए भन्ने प्रारम्भिक अनुसन्धानले देखाएको छ । उनका अनुसार हाउजिङ क्षेत्रमा बस्दै आएका ती व्यक्तिहरूले भिसा अनुरूपको व्यवसायबारे कुनै स्पष्ट विवरण दिन सकेका छैनन् ।

ढकालका कथनअनुसार, पक्राउ परेकाहरूले नेपाली किशोरीलाई टिकटक भिडियो बनाउन लगाउने, त्यसकै माध्यमबाट अन्य चिनियाँ व्यक्तिहरूसँग सम्पर्क गराउने र अन्ततः विवाहसम्म पुर्‍याउने काम गर्दै आएका थिए । केही युवतीलाई चीनसम्म पठाइएको प्रारम्भिक छानबिनबाट थाहा भएको विभागले जनाएको छ ।

विभागको अनुसन्धानले पक्राउ परेकामध्ये दुई व्यक्तिले पछिल्ला १० वर्षदेखि पर्यटक, विद्यार्थी र व्यवसायिक भिसाको प्रयोजनमा नेपाल बस्दै आएको पत्ता लागेको छ । उनीहरूको भिसा दुरुपयोग तथा अवैध कार्यमा संलग्नता देखिएको विभागको भनाइ छ ।

विद्यमान कानुनअनुसार नेपालमा गैरकानुनी रूपमा बसोबास वा गतिविधि सञ्चालन गर्ने विदेशी नागरिकलाई ५० हजार रुपैयाँसम्म जरिवाना गर्न तथा आवश्यक परे देशबाट निष्कासन गर्न सकिने व्यवस्था छ । विभागले आवश्यक कानुनी प्रक्रिया अघि बढाइरहेको जनाएको छ ।