मन्त्री घिसिङद्वारा इलामका बाढीपहिरो प्रभावित क्षेत्रको निरीक्षण

इलाम । भौतिक पूर्वाधार तथा यातायातमन्त्री कुलमान घिसिङले इलामका बाढीपहिरो प्रभावित क्षेत्रको निरीक्षण गरेका छन् । उनले बाढीपीडित परिवारलाई भेटेर राहत वितरण पनि गरे ।

मन्त्री घिसिङले माइखोलास्थित टापु क्षेत्रमा बाढीले बगाएका २८ घरपरिवारलाई भेट गरी राहत वितरण गरे ।

आठ दिनदेखि अवरुद्ध मेची राजमार्गको राजदुवाली सडक खण्डको निरीक्षण गर्दै मन्त्री घिसिङले सडक खोल्ने कार्यलाई पहिलो प्राथमिकता दिएको बताए ।

अवरुद्ध सडकका सम्बन्धमा भूगर्भविद् तथा डिभिजन सडक कार्यालय इलामका इन्जिनियरसँग समेत उनले छलफल गरे ।

गृहमन्त्री ओमप्रकाश अर्यालसमेत इलाम आउने कार्यक्रम सार्वजनिक गरिएको थियो । तर, उनी नआएपछि इलाम नगरपालिकामात्र निरीक्षण गरेको भन्दै अन्य पालिकाका पीडितहरूले सामाजिक सञ्जालमा आलोचना गरेका छन् । राजमार्ग अबरुद्ध हुँदा इन्धन र स्वास्थ्य सेवामा समेत संकट चुलिएको छ ।

गत १८ गतेको अविरल वर्षासँगै आएको बाढीपहिरोमा इलाममा मात्रै ३९ जनाले ज्यान गुमाएका छन्, १ जना बेपत्ता छन् भने घर क्षतिको कारण २६५ परिवार विस्थापित भएका छन् । जसमध्ये १७२ परिवार इलाम नगरपालिकामा मात्र छन् ।