महावीर पुनको आग्रहः ‘मन्त्री नभन्नुहोस्, भन्न मन लागे कबाडी वैज्ञानिक मन्त्री भन्नुहोला !’

काठमाडौं । शिक्षा, विज्ञान तथा प्रविधि मन्त्रीको रूपमा सिफारिस भएका महावीर पुनले आफूलाई मन्त्री भनेर सम्बोधन नगर्न आग्रह गरेका छन् । प्रधानमन्त्री सुशीला कार्कीले आइतबार उनको नाम राष्ट्रपतिलाई मन्त्री नियुक्तिको लागि सिफारिस गरेपछि पुनले सामाजिक सञ्जालमार्फत यस्तो प्रतिक्रिया दिएका हुन् ।

फेसबुकमा ‘मेरो पहिलो घोषणा’ शीर्षक दिँदै पुनले लेखेका छन्, “मलाई मन्त्री नभन्नुहोला । कसैलाई मन्त्री भन्न साह्रै रहर छ भने ‘कबाडी वैज्ञानिक मन्त्री’ भन्नुहोला ।”

उनले थप आग्रह गरेका छन् कि कोही पनि फोन गरेर बधाई दिन वा खादा र माला लिएर घरमा नआउनुहोला । त्यसको सट्टा, शिक्षा, विज्ञान र प्रविधिको क्षेत्रमा पाँच महिनाको अवधिमा गर्न सकिने ठोस काम र आइडिया भए, त्यसलाई ह्वाट्सएपमा सेयर गर्न अनुरोध गरेका छन् ।

महावीर पुनको यो विनम्र र व्यावहारिक शैलीले उनको नेतृत्वमा केही फरक र प्रभावकारी कामको अपेक्षा गर्न सकिन्छ ।