जनकपुरधामबाट कांग्रेसको ‘भिजन १०’ प्रतिज्ञापत्र सार्वजनिक, समुन्नत नेपालको लक्ष्य

काठमाडौं । नेपाली कांग्रेसले प्रतिनिधि सभा निर्वाचनलाई लक्षित गर्दै जनतामाझ आफ्नो चुनावी प्रतिज्ञापत्र सार्वजनिक गरेको छ । ऐतिहासिक तथा सांस्कृतिक नगरी जनकपुरधामबाट बुधबार ‘भिजन १०’ अवधारणासहित प्रतिज्ञा–पत्र सार्वजनिक गरिएको हो ।

प्रतिज्ञा–पत्र सार्वजनिक कार्यक्रममा पार्टी सभापति गगनकुमार थापा, उपसभापति तथा निर्वाचन परिचालन समितिका संयोजक विश्वप्रकाश शर्मा, उपसभापति पुष्पा भुसाल लगायत मधेस प्रदेशका नेताहरूको उपस्थिति रहेको थियो ।

प्रतिज्ञा–पत्र सार्वजनिक गरेपछि पार्टीले सानेपास्थित केन्द्रीय कार्यालयमा पत्रकार सम्मेलन गर्दै ‘भिजन १०’ का मुख्य बुँदाबारे विस्तृत जानकारी गराएको छ । कांग्रेसले आगामी आमनिर्वाचनबाट बहुमतसहित लोकतान्त्रिक तथा जनहितमा केन्द्रित सरकार गठन गर्ने लक्ष्य राखेको जनाएको छ ।

पार्टी प्रवक्ता देवराज चालिसेले प्रतिज्ञा–पत्र जिम्मेवारी, दृष्टिकोण र स्पष्ट कार्ययोजनामा आधारित रहेको दाबी गर्दै नेपाललाई उत्कृष्ट राष्ट्र बनाउने आधार प्रस्तुत गरिएको बताए । उनका अनुसार प्रतिज्ञा–पत्रका हरेक प्रतिबद्धता कार्यान्वयनमुखी रहेकाले त्यसकै आधारमा पार्टी र नेतृत्वको मूल्यांकन हुनुपर्ने कांग्रेसको धारणा छ ।

कांग्रेसले प्रतिज्ञा–पत्र केवल घोषणामा सीमित नरहने उल्लेख गर्दै ‘समुन्नत नेपाल, सम्मानित नेपाली’ भन्ने नारालाई व्यवहारमा उतार्ने प्रतिबद्धता व्यक्त गरेको छ । आगामी दिनमा मतदाता र जनताले प्रतिज्ञापत्र कार्यान्वयनकै आधारमा पार्टीको कार्यसम्पादन मूल्यांकन गर्नुपर्ने पार्टीको अपेक्षा छ ।

कांग्रेसले आफ्नो चुनावी दृष्टिकोणलाई सरल रूपमा ‘भिजन १०’का रूपमा प्रस्तुत गर्दै यसलाई ‘कांग्रेस टु प्वाइन्ट जिरो’को आधारका रूपमा व्याख्या गरेको छ । पार्टीले पुनरुत्थानको चरणमा प्रवेश गरिसकेको दाबी गर्दै जनताको अपेक्षा अनुरूप भविष्य निर्माण गर्ने संकल्प व्यक्त गरेको छ ।

कांग्रेसका १० भिजन

• सम्मानित भएर बाँच्न पाउने नेपाल
• सपना देख्न सक्ने नेपाल
• सम्पत्ति र रोजगारी सृजनालाई प्रोत्साहन गर्ने नेपाल
• पेटभरि खुवाउने, देशलाई चिनाउने किसानको नेपाल
• ओखती र ओत दिने नेपाल
• छोराछोरी पढाउन आर्थिक भार नपर्ने नेपाल
• बेथिति र हैरानीमुक्त विधिको शासन भएको नेपाल
• मौलिकतामा गर्व गर्ने आधुनिक नेपाल
• विश्वले सम्मान गर्ने स्वाभिमानी नेपाल
• समुन्नतिमा लम्किने नेपाल