देशभर बदलीसहित केही स्थानहरूमा मध्यमदेखि भारी वर्षाको सम्भावना

काठमाडौं । हाल देशमा मनसुन सक्रिय रहँदा मनसुनको न्यून चापीय रेखा सरदर स्थान आसपास अवस्थित रहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ । साथै, अरब सागर र बंगालको खाडीबाट जलवाष्पयुक्त हावा प्रवेश गरिरहेकोले देशभरको मौसममा प्रभाव परेको छ ।

आज दिउँसो देशभर सामान्यदेखि पूर्ण बदली रहनेछ । कोशी, बागमती, गण्डकी, लुम्बिनी र सुदूरपश्चिम प्रदेशसहित देशको पहाडी भूभागका केही स्थानहरूमा तथा बाँकी भूभागका थोरै स्थानहरूमा मध्यम वर्षा हुनसक्ने सम्भावना रहेको महाशाखाले जनाएको छ ।

त्यसैगरी, कोशी, मधेश, बागमती, लुम्बिनी र सुदूरपश्चिम प्रदेशका पहाडी तथा तराई भूभागका एक–दुई स्थानमा भारी वर्षाको सम्भावना पनि रहेको छ ।

आज रातिको समयमा पनि देशभर सामान्यदेखि पूर्ण बदली रहनेछ । कोशी, मधेश, बागमती, गण्डकी र लुम्बिनी प्रदेशका थोरै स्थानहरूमा तथा अन्य प्रदेशका एक–दुई स्थानमा मध्यम वर्षा हुन सक्ने देखिएको छ ।

सार्वजनिक स्थानमा यात्रा गर्दा र नदी तथा खोल्सानजिक जानुहुँदा विशेष सतर्कता अपनाउन महाशाखाको सुझाव छ । भारी वर्षाका कारण पहिरो तथा बाढीको जोखिम समेत रहन सक्ने भएकाले सचेत रहन सबैलाई अनुरोध गरिएको छ ।