सैनिक मुख्यालय अगाडि जेन जी युवाहरूबीच झडप

काठमाडौं । अन्तरिम प्रधानमन्त्रीको नियुक्तिका लागि दबाब दिन भन्दै सैनिक मुख्यालय अगाडि भेला भएका जेन जी युवाहरूबीच भीषण झडप भएको छ । सैनिक मुख्यालयअगाडिको सडकमा दुई फरक विचार राख्ने समूहबीच कुटाकुट भएको हो ।

प्राप्त जानकारीअनुसार झडपका क्रममा गालीगलौज, धकेलाधकेल हुँदै हात हालाहालको स्थिति उत्पन्न भएको थियो ।

एक पक्षले पूर्वप्रधानन्यायाधीश सुशीला कार्कीलाई अन्तरिम सरकारको नेतृत्व दिन नहुने भन्दै विरोध प्रदर्शन गरिरहेका थिए । उनीहरूले कार्कीविरुद्ध नाराबाजी गर्दै प्लेकार्डसमेत प्रदर्शन गरेका थिए ।

उक्त प्रदर्शनको विपक्षमा अर्का समूह उभिएको थियो, जसमा काठमाडौं महानगरका मेयर बालेन्द्र साह (बालेन) र धरानका मेयर हर्क साम्पाङका समर्थक युवाहरूको उपस्थिति थियो ।

दुई पक्षबीचको मतभेद एकाएक झडपमा परिणत भएपछि स्थिति तनावपूर्ण बनेको हो ।

यस घटनाले जेन जी पुस्ता पनि राजनीतिक ध्रुवीकरणमा फसेको संकेत दिएको छ । अहिलेको संवैधानिक अन्योलबीच नेतृत्वको खोजीमा युवाहरूको प्रत्यक्ष संलग्नता सकारात्मक भए पनि हिंसात्मक रूप लिनु चिन्ताजनक विषय हो ।