अविरल वर्षापछि रोशी क्षेत्रका अवरुद्ध सडक खुले

काभ्रे । काभ्रेको रोशी क्षेत्रमा बुधबार रातिदेखि परेको अविरल वर्षाका कारण अवरुद्ध भएका सडकहरू अहिले खुलाइएको छ । अवरोध हटेसँगै सवारी आवागमन पूर्ण रूपमा सञ्चालनमा आएको छ ।

बीपी राजमार्ग अन्तरगत चार ठाउँमा पहिरो जाँदा रोशी गाउँपालिका–९ को पिल्थलीबेशी र बिरुवाडाँडा, रोशी–११ को कालढुंगा खहरेखोला र रोशी–१२ माम्तीमा सुख्खा पहिरोले सडक अवरुद्ध भएको थियो ।

इलाका प्रहरी कार्यालय मंगलटारका प्रमुख इश्वर कार्कीका अनुसार, बिहान ७ बजेदेखि सबै ठाउँको अवरोध हटाइएको हो । उनका अनुसार सडक अहिले पूर्ण रूपमा सञ्चालनमा आएको छ ।

अझै पनि वर्षा भइरहेकाले रोशी खोलाको सतह बढिरहेको जनाउँदै प्रहरीले सवारी चालकहरूलाई सावधानीपूर्वक सवारी चलाउन अनुरोध गरेको छ ।