उपसभामुख हटाउने प्रक्रियाबाट टाढै बस्छौँः एकीकृत समाजवादी

काठमाडौं । नेपाली कांग्रेस र नेकपा एमालेले प्रतिनिधिसभाकी उपसभामुख इन्दिरा राना मगरलाई पदबाट हटाउने पहल चर्काइरहेका बेला नेकपा (एकीकृत समाजवादी) ले भने उक्त प्रयासमा सहभागी नहुने स्पष्ट पारेको छ ।

पार्टीका प्रमुख सचेतक मेटमणि चौधरीले उपसभामुख हटाउने विषयमा अहिले कुनै औचित्य नभएको भन्दै कांग्रेस–एमालेको हस्ताक्षर संकलन अभियानलाई समर्थन नगर्ने बताए । ‘हामी उपसभामुख हटाउनेतर्फ जान्नौँ, अहिले त्यो आवश्यक छैन,’ चौधरीको भनाइ छ ।

एकीकृत समाजवादीका वरिष्ठ उपाध्यक्ष एवं संसदीय दलका उपनेता राजेन्द्र पाण्डेले पनि उपसभामुख हटाउने विषय पार्टीमा औपचारिक रूपमा उठाइएन भन्दै आकस्मिक रूपमा ल्याइएको प्रस्तावप्रति असन्तुष्टि जनाएका छन् ।

नेपाली कांग्रेस र एमालेले संयुक्त रूपमा उपसभामुख हटाउन प्रस्ताव दर्ता गर्ने तयारी गर्दै उनीहरूले आफ्नो दलका सांसदबाट हस्ताक्षर संकलन सुरु गरिसकेका छन् ।

तर साना दलहरूको समर्थनबिना दुईतिहाइ मत पुग्न नसक्ने भएपछि एकीकृत समाजवादीको दूरीले उक्त अभियानमा अवरोध पर्ने संकेत देखिएको छ । अब कांग्रेस–एमालेले अन्य दलहरूलाई कसरी आफ्नो पक्षमा ल्याउँछन् भन्ने विषयले उपसभामुख हटाउने प्रस्तावको भवितव्य निर्धारण गर्नेछ ।