पशुपति आर्यघाट प्रकरणः शिवको पूजा गर्ने उद्देश्यले ‘एक मुठी खरानी’ मात्र लगेको बयान

काठमाडौं । पशुपति आर्यघाटबाट जलिरहेको शवको खरानी र अंग संकलन गरेको आरोपमा पक्राउ गरिएका व्यक्तिहरूले भगवान शिवको पूजा गर्ने उद्देश्यले “एक मुठी खरानी” मात्र लगेको बयान दिएका छन् ।

साउन २३ गते शुक्रबार बनेपा–९ का राम शाहीको अन्तिम संस्कार हुँदै गरेको ठाउँबाट खरानी उठाएको आरोपमा काभ्रेका ६१ वर्षीय घाटे ब्राह्मण गणेश ढकाल र उदयपुरका २४ वर्षीय उनका सहयोगी विनायक मैनाली पक्राउ परेका थिए । उनीहरू अहिले गौशाला प्रहरी वृत्तमा हिरासतमा छन् ।

यस घटनामा संलग्न रहेको आरोपमा थप दुई जनालाई पनि बुधबार पक्राउ गरिएको प्रहरीले जनाएको छ । उनीहरु काठमाडौंको कपनमा सैलुन सञ्चालन गर्ने ४२ वर्षीय रामनन्दन ठाकुर (घर सर्लाही) र ४१ वर्षीय मिश्रीलाल यादव (घर सप्तरी) रहेका छन् ।

प्रहरीका अनुसार ठाकुर र यादवले पशुपतिनाथ मन्दिर दर्शनको क्रममा त्यहीँका एक बाबाले ‘जलिरहेको शवको खरानी शिवलिङ्गमा चढाए ग्रहदशा शान्त हुन्छ’ भनेपछि घाटे ब्राह्मणसँग खरानी मागेका थिए । त्यसक्रममा उनले ‘स्वेच्छाले ५ सय रुपैयाँ’ दिएको बयान दिएका छन् । खरानी लिएर उनीहरूले पशुपतिनाथ परिसरको शिवलिङ्गमा चढाइसकेकाले अन्यत्र लैजानको उद्देश्य नरहेको दाबी गरेका छन् ।

चारैजनामाथि हाल अभद्र व्यवहारअन्तर्गत मुद्दा दर्ता गरी म्याद थप गरिएको छ । मासु वा हड्डीजस्ता मानव अवशेष लगेको पुष्टि नभएकाले जघन्य अपराधसम्बन्धी अन्य कानुनी प्रक्रिया अघि नबढाइने प्रहरी स्रोतले जनाएको छ ।