कैलाली जेलमा कैदीबीच हिंसात्मक झडप, एकको ज्यान गयो, ४८ घाइते

कैलाली । कैलाली जिल्ला कारागारमा कैदीबन्दीहरूबीच भएको हिंसात्मक झडपमा एक कैदीको मृत्यु भएको छ भने ४८ जना घाइते भएका छन् ।

मृतकको पहिचान हालसम्म सार्वजनिक गरिएको छैन । कारागार प्रशासनले परिवार तथा स्थानीय निकायसँग सम्पर्क गर्ने प्रयास भए पनि सफल नभएको जनाएको छ । घाइतेहरूलाई सेती प्रादेशिक अस्पतालमा भर्ना गरिएको छ, जसमा पाँच जनालाई उपचारपछि फिर्ता पठाइसकिएको छ ।

निनित्त कारागार प्रशासक रामकुमार चौधरीका अनुसार कारागारमा ए, बी र महिला गरी तीन ब्लक रहेका छन् । यसपटकको झडप ए र बी ब्लकका कैदीबीच भएको हो ।

चौधरीका भनाइमा, टीकापुरको कर्तव्यज्यानसम्बन्धी एउटै मुद्दामा सजाय भोगिरहेका १८ जना कैदीलाई अन्यत्र स्थानान्तरणको तयारी भइरहेको थियो । स्थानान्तरण प्रक्रिया सुरु हुने क्रममा ‘नाइके’ र ‘भाइनाइके’ बन्ने विषयमा उनीहरूबीच वादविवाद चर्किँदै कुटाकुटमा परिणत भएको हो ।

कारागार स्रोतका अनुसार यसअघि पनि बिहीबार स्थानान्तरणसम्बन्धी विवाद हुँदा पाँच जना कैदी घाइते भएका थिए । हालको घटनाबारे विस्तृत छानबिन भइरहेको प्रशासनले जनाएको छ ।