पाँचथरमा हराएका दुई दाजुभाइको शव बिरुवा खोलामा फेला

पाँचथर । पाँचथरको याङवरक गाउँपालिका–१ च्याङथापुबाट ६ दिनअघि बेपत्ता भएका एकै परिवारका दुई बालबालिका मृत फेला परेका छन् ।

स्थानीय बिर्खबहादुर राईका १० वर्षीय छोरा शिशिर राई र ४ वर्षीया छोरी नानुमा राईको शव मंगलबार बिहान बिरुवा खोलाको बगरमा भेटिएको जिल्ला प्रहरी कार्यालय पाँचथरले जनाएको छ ।

प्रहरी निरीक्षक तथा सूचना अधिकारी रुपेश तामाङका अनुसार, घरबाट करिब सात किलोमिटर टाढा खोलाको किनारमा दुईसय मिटरको फरकमा दाजु–बहिनीको शव भेटिएको हो । घटनास्थलमा प्रहरी निरीक्षक खेमराज घिमिरेको नेतृत्वमा प्रहरी टोली परिचालन गरिएको छ ।

शिशिर र नानुमा यही साउन १५ गतेदेखि बेपत्ता थिए । उनीहरूको खोजीमा परिवार, स्थानीयवासी, प्रहरी र जनप्रतिनिधिहरू निरन्तर खटिएका थिए । हराएको साँझदेखि नै जंगल, खोलापारि, नदी किनारलगायत क्षेत्रहरूमा खोजी गरिएको थियो ।

साविक च्याङथापु–१ र ८ को सीमाबाट बग्ने बिरुवा खोलामै दुवै बालबालिकाको शव फेला परेको वडा अध्यक्ष राजेन्द्र खालिङ राईले पुष्टि गरेका छन् ।

शवहरूलाई पोष्टमार्टमका लागि जिल्ला अस्पताल ल्याउने तयारी भइरहेको प्रहरी स्रोतले जानकारी दिएको छ । घटनाबारे थप अनुसन्धान भइरहेको प्रहरीले जनाएको छ ।