पर्वतमा पहिरोः बेपत्ता दम्पतीमध्ये श्रीमानको शव फेला

पर्वत । जिल्लाको मोदी गाउँपालिका–३ देउरालीको लाङ्दीमा पहिरोले पुरिएको घरभित्र बेपत्ता भएका एक दम्पतीमध्ये श्रीमानको शव फेला परेको छ ।

शनिबार रातिदेखि लगातार परेको अविरल वर्षासँगै घरमाथिबाट खसेको पहिरोले छविलाल विश्वकर्मा (७६) र उनकी श्रीमती विष्णुमती बिक (७६) लाई पुरेको थियो । पहिरोले घरको एकापट्टीको भित्तो भत्किएर उनीहरूलाई पुरेको स्थानीयले बताएका छन् ।

जननेत्र माध्यमिक विद्यालय देउपुरका शिक्षक भूमिराज शर्माका अनुसार, बिहानैदेखि खोजी कार्यमा जुटेका स्थानीयले आइतबार बिहान करिब सवा ९ बजे छविलालको शव पहिरोस्थलमै भेटेका हुन् ।

विष्णुमतिको खोजी कार्य अहिले पनि जारी छ । मोदी गाउँपालिका डिमुवाबाट आएको प्रहरी टोलीसहित जिल्ला प्रहरी कार्यालय पर्वत र डिमुवा प्रहरी चौकीबाट थप जनशक्ति परिचालन गरिएको छ । तर पहिरोका कारण गाउँमा पुग्ने बाटो अवरुद्ध भएकाले उद्धारमा कठिनाइ भइरहेको जनाइएको छ ।

मोदी गाउँपालिकाको केन्द्र पातिचौरबाट पहिरो प्रभावित क्षेत्रमा सामान्य अवस्थामा एकदेखि डेढ घण्टामा पुग्न सकिन्छ । तर पहिरोका कारण सडक आवागमन ठप्प भएको छ ।

उक्त घरमा बस्दै आएकी छविलाल दम्पतीकी बुहारी पवित्रा बिक (३२) भने समयमै भागेर ज्यान जोगाउन सफल भएकी छन् ।

शनिबार रातिदेखि पर्वत जिल्लासहित वरपरका क्षेत्रमा भारीदेखि अति भारी वर्षा भइरहेकाले खोला र नदीहरूमा जलप्रवाह उच्च छ । यसले गर्दा अन्य स्थानमा पनि जोखिम बढेको जनाइएको छ ।