ताप्लेजुङमा मध्यरातको पहिरोले घर पुरिँदा तीन जनाको सकुशल उद्धार

ताप्लेजुङ । मध्यरातको समयमा घरमाथिबाट आएको पहिरोले घर भत्किँदा थुनिएका तीन जनालाई सकुशल उद्धार गरिएको छ ।

सिदिङ्वा गाउँपालिका–३, आङखोपका ६१ वर्षीय हस्तबहादुर कटुवाल, उनकी पत्नी ठगमाया कटुवाल र छोरी सम्झना कटुवाल पहिरोले पुरिएको घरभित्र थुनिएका थिए । कुलोको पानी थुनिँदा उत्पन्न भएको चापका कारण राति १ः०० बजेतिर माथिबाट एक्कासि पहिरो खसेर उनीहरूको घर भत्किएको थियो ।

उक्त समय मटानतिर सुतेका छोराबुहारीलाई ठूलो आवाजले ब्युझाएपछि उनीहरूले गाउँमा खबर गरे । गाउँलेहरू तत्कालै भेला भई तीनै जनालाई उद्धार गर्न सफल भएका हुन् ।

घटनामा ठगमाया कटुवाल केही घाइते भएकी छन् भने हस्तबहादुर र सम्झनालाई सामान्य चोटपटक लागेको स्थानीयले जनाएका छन् ।

छिमेकी मौसम लिम्बूका अनुसार पहिरोले पुरिएको घरमा हस्तबहादुर दम्पती बस्दै आएका थिए र त्यहीँ खाना पकाउने गरिन्थ्यो । अर्को कोठामा छोराबुहारी बस्ने गरेको बताइएको छ।

‘खानेकुरादेखि भाँडाकुँडा केही पनि बाँकी छैन,’ मौसमले भने, ‘बासको व्यवस्था भए पनि दैनिकी चलाउने सामान सबै पहिरोले बगायो ।’