एआईजी वंशीराज दाहाल सशस्त्र प्रहरी सेवाबाट बर्खास्त

काठमाडौं । सशस्त्र प्रहरी अतिरिक्त महानिरीक्षक (एआईजी) वंशीराज दाहाललाई सेवाबाट हटाइएको छ । आचरण उल्लंघन, अनुशासनहीनता तथा संगठनको प्रतिष्ठामा आँच पुर्‍याएको कसुरमा गृह मन्त्रालयले उनीमाथि विभागीय कारबाही गरेको हो ।

गृह मन्त्रालयले शुक्रबार विज्ञप्ति जारी गर्दै दाहाललाई सशस्त्र प्रहरी सेवाबाट हटाउने निर्णय गरिएको जानकारी दिएको छ । मन्त्रालयका अनुसार उनलाई २०८३ असोज २३ गतेदेखि लागू हुने गरी सेवाबाट हटाइएको हो ।

मन्त्रालयले दाहालले बारम्बार आचरणसम्बन्धी नियम उल्लंघन गरेको, अनुशासनहीन कार्य गरेको तथा नेपाल सरकार वा आफू कार्यरत संगठनको मानप्रतिष्ठा र छविमा आँच पुग्ने गतिविधि गरेको जनाएको छ ।

यिनै कसुरका आधारमा उनीमाथि विभागीय कारबाही गरिएको मन्त्रालयको विज्ञप्तिमा उल्लेख छ ।

गृह मन्त्रालयका सहसचिव एवं प्रवक्ता आनन्द काफ्लेद्वारा जारी विज्ञप्तिमार्फत दाहाललाई सेवाबाट हटाइएको औपचारिक जानकारी सार्वजनिक गरिएको हो ।