एआईजी दाहालमाथि कारबाही गर्न छानबिन समितिको सिफारिस

काठमाडौं । गम्भीर सूचना चुहाएको आरोपमा निलम्बनमा परेका सशस्त्र प्रहरी बलका अतिरिक्त महानिरीक्षक (एआईजी) वंशीराज दाहालमाथि कारबाही गर्न सिफारिस गरिएको छ ।

एआईजी अन्जनीकुमार पोखरेलको नेतृत्वमा गठित एक सदस्यीय छानबिन समितिले दाहालमाथि कारबाही गर्न गृहमन्त्री सुधन गुरुङसमक्ष सिफारिस गरेको हो । समितिले छानबिन पूरा गरी तयार पारेको प्रतिवेदनमार्फत सशस्त्र प्रहरी नियमावलीको दफा ११३ अनुसार कारबाही प्रक्रिया अघि बढाउन सुझाव दिएको छ ।

संवेदनशील तथा गोप्य सूचना चुहाएको आरोप लागेपछि दाहाललाई निलम्बन गरिएको थियो । सोही प्रकरणको वास्तविकता पत्ता लगाउन र घटनामा उनको संलग्नताबारे छानबिन गर्न समिति गठन गरिएको थियो ।

समितिले छानबिनका क्रममा प्राप्त विवरण तथा तथ्यहरूको अध्ययनपछि प्रतिवेदन तयार पारेको हो । प्रतिवेदनमा नियमावलीको व्यवस्थाअनुसार दाहालमाथि कारबाही गर्न सिफारिस गरिएको जनाइएको छ ।

प्रतिवेदन गृहमन्त्रीसमक्ष पेस भएसँगै अब दाहालमाथि केकस्तो कारबाही हुने भन्ने विषय गृह मन्त्रालयको निर्णयमा निर्भर रहनेछ ।