बाढी–पहिरोको जोखिमपछि तातोपानी नाका अनिश्चितकालका लागि बन्द

काठमाडौं । बाढी तथा पहिरोको जोखिम बढ्दै गएपछि चीनले नेपालसँगको प्रमुख व्यापारिक नाका तातोपानी अनिश्चितकालका लागि बन्द गरेको छ । सीमावर्ती क्षेत्रमा जोखिम कायमै रहेकाले चिनियाँ पक्षले व्यापारिक आवागमन तत्काल सञ्चालन नगर्ने निर्णय गरेको हो ।

यसअघि विनाशकारी बाढीका कारण नेपाल–चीनको अर्को महत्वपूर्ण व्यापारिक नाका रसुवागढी पनि प्रभावित भएको थियो । बाढीले रसुवाको टिमुरे बजारसँगै भन्सार तथा अध्यागमन कार्यालयका संरचनामा समेत ठूलो क्षति पुर्‍याएको छ । दुवै प्रमुख नाका प्रभावित भएपछि नेपाल–चीन व्यापारमा थप चुनौती उत्पन्न भएको छ ।

ल्हासास्थित नेपाली महावाणिज्यदूत लक्ष्मी निरौलाका अनुसार तातोपानी नाका आसपासको लिपिङ क्षेत्रमा पहिरोको जोखिम अझै स्थिर भइसकेको छैन । जोखिम कम नभएसम्म चिनियाँ पक्षबाट व्यापारिक गतिविधि पुनः सञ्चालन हुने सम्भावना नरहेको उनले बताएका छन् ।

यद्यपि, तातोपानी नाकाबाट यात्रुहरूको आवतजावत भने जारी रहने जनाइएको छ । व्यापारिक प्रयोजनका लागि नाका बन्द गरिए पनि मानवीय तथा यात्रु आवागमनलाई भने निरन्तरता दिइनेछ ।

रसुवागढी र तातोपानी दुवै नाका बन्द भएपछि नेपालका लागि चीनसँगको व्यापारिक आवागमनमा वैकल्पिक मार्गको आवश्यकता बढेको छ । हाल कोरला नाका मात्र सञ्चालनमा रहेकाले चीनसँगको व्यापारका लागि उक्त नाकामाथि निर्भरता बढ्ने अवस्था देखिएको छ ।

लगातारको बाढी र पहिरोका कारण सीमा क्षेत्रमा सडक, पुल तथा अन्य पूर्वाधारमा क्षति पुगेकाले व्यापारिक गतिविधि सामान्य अवस्थामा फर्काउन समय लाग्ने देखिएको छ । नाका सञ्चालनका लागि सुरक्षा अवस्था तथा भौतिक संरचनाको अवस्थालाई मुख्य आधार बनाइने बताइएको छ ।