गायिका नितुको निधनपछि गायक गिरीविरुद्ध जाहेरी, आत्महत्यामा दुरुत्साहनको आरोप

काठमाडौं । गायिका नितु पौडेलको निधनपछि उनको परिवारले गायक बाबुल गिरीविरुद्ध आत्महत्या दुरुत्साहनको आरोप लगाउँदै प्रहरीमा जाहेरी दर्ता गरेको छ ।

काठमाडौं प्रहरी परिसरका एसपी पवन भट्टराईका अनुसार नितुकी दाइको तर्फबाट दर्ता गरिएको जाहेरीमा गायक गिरीले लामो समयदेखि मानसिक र भावनात्मक रूपमा नितुलाई दबाबमा राखेको र सोही कारणले उनले आत्मदाहको प्रयास गरेको उल्लेख छ ।

गत शनिबार पौडेलले गिरीकै स्टुडियोभित्र आफूमा आगो लगाएकी थिइन् । तत्काल उद्धार गरिएपछि उनलाई कीर्तिपुरस्थित बर्न अस्पताल लगिएको थियो, तर गम्भीर चोटका कारण उनको आज बिहान निधन भएको हो ।

प्रहरीले घटनापछि नै गिरीलाई नियन्त्रणमा लिएर बयान लिएको बुझिएको छ । प्रारम्भिक अनुसन्धानमा दुवैबीच व्यक्तिगत र पेशागत विवाद रहेको आशंका गरिएको छ । तथापि, प्रहरीले हालसम्म कुनै ठोस निष्कर्ष ननिकालेको र अनुसन्धानलाई थप गहिर्याउने जनाएको छ ।

पौडेल नेपाली संगीत क्षेत्रमा आफ्नो मिठो स्वर र भावनात्मक गीतका कारण परिचित थिइन् । उनी पछिल्ला वर्षमा विभिन्न लोक तथा आधुनिक गीत रेकर्डिङमा सक्रिय थिइन् । उनका साथी र सहकर्मीहरूले सामाजिक सञ्जालमार्फत श्रद्धाञ्जली दिँदै उनको मृत्यु ‘संगीत जगतका लागि ठूलो क्षति’ भएको प्रतिक्रिया दिएका छन् ।

प्रहरीले पोस्टमार्टम रिपोर्ट र डिजिटल प्रमाणका आधारमा घटनाको कारण र जिम्मेवारी निर्धारण गर्ने कार्य अगाडि बढाइरहेको जनाएको छ ।