इरानी ड्रोन हमलापछि कुवेतको अन्तर्राष्ट्रिय विमानस्थल बन्द, सबै उडान रोकिए

काठमाडौं । कुवेतले आफ्नो एकमात्र अन्तर्राष्ट्रिय विमानस्थलमा भएको इरानी ड्रोन आक्रमणपछि सबै उडान सेवा अनिश्चितकालका लागि स्थगित गरेको छ । आक्रमणका कारण विमानस्थलको मुख्य संरचनामा क्षति पुगेको र केही व्यक्ति घाइते भएको कुवेती अधिकारीहरूले बताएका छन् ।

अमेरिकाले इरानका विभिन्न सैन्य लक्ष्यमा कारबाही गरेपछि त्यसको प्रत्युत्तरस्वरूप इरानले कुवेतमा आक्रमण गरेको बताइएको छ । कुवेती विदेश मन्त्रालयका अनुसार विमानस्थल बाहेक अन्य स्थानहरूमा पनि आक्रमण भएको छ, जसमा एक जनाको मृत्यु भएको पुष्टि गरिएको छ ।

यसैबीच, अमेरिकी सेनाले इरानबाट प्रहार गरिएका मिसाइल तथा ड्रोनहरू अवरोध गरी नष्ट गरेको जनाएको छ । अमेरिकी सेन्ट्रल कमान्ड (सेन्टकम) का अनुसार हर्मुज जलडमरूमध्य नजिकका केही रणनीतिक लक्ष्यमा पनि ‘आत्मरक्षात्मक’ कारबाही गरिएको छ ।

सेन्टकमले पर्सियन खाडी क्षेत्रमा इरानी बन्दरगाहतर्फ जाँदै गरेको खाली तेलवाहक जहाजलाई पनि निष्क्रिय बनाइएको दाबी गरेको छ । त्यसको प्रतिक्रिया जनाउँदै इस्लामिक रिभोलुसनरी गार्ड कोर्प्स (आईआरजीसी) ले अमेरिकाले इरानमाथि आक्रमण गरेकाले आफूहरूले जवाफी कदम चालेको जनाएको छ ।

कुवेतमा अमेरिकी सेनाका पाँच सैन्य अड्डा रहेका छन् । पछिल्ला दिनहरूमा अमेरिका र इरानबीच लगातार सैन्य तनाव बढिरहेको छ । अमेरिकाले दक्षिणी इरानका राडार तथा कमाण्ड सेन्टरहरूलाई लक्षित गर्दै हवाई आक्रमण गरेको थियो भने इरानले ती कारबाहीका लागि प्रयोग भएका अमेरिकी सैन्य संरचनालाई निशाना बनाएको दाबी गरेको छ ।

अमेरिकी समाचार संस्था एपीका अनुसार इरानले कुवेत र बहराइनस्थित अमेरिकी सैन्य अड्डातर्फ समेत मिसाइल प्रहार गरेको छ ।

यता, तीन महिनादेखि जारी अमेरिका–इरान द्वन्द्व अन्त्य गर्ने प्रयासस्वरूप कूटनीतिक वार्ता जारी छ । अमेरिकी राष्ट्रपति डोनाल्ड ट्रम्पले सम्भावित सम्झौताका केही बुँदामा संशोधन गर्न वार्ता टोलीलाई निर्देशन दिएको बताइएको छ ।

अमेरिकी सञ्चारमाध्यम एक्सियसका अनुसार ट्रम्पले इरानको आणविक कार्यक्रम, उच्च प्रशोधित युरेनियमको व्यवस्थापन तथा हर्मुज जलडमरूमध्यमा जहाज आवागमनको सुरक्षाबारे थप स्पष्ट प्रतिबद्धता चाहेका छन् । प्रस्तावित सम्झौतामा इरानले भविष्यमा आणविक हतियार नबनाउने, करिब ४०० किलो उच्च प्रशोधित युरेनियम हस्तान्तरण गर्ने तथा हर्मुज क्षेत्रमा निर्बाध जल यातायात सुनिश्चित गर्ने विषयलाई थप स्पष्ट बनाउने प्रयास भइरहेको बताइएको छ ।