रोनाल्डोको सपना पूरा, अल–नासर साउदी लिग च्याम्पियन

काठमाडौं । क्रिष्टियानो रोनाल्डोको नेतृत्वमा अल–नासरले अन्ततः साउदी प्रो लिगको उपाधि जितेको छ । बिहीबार भएको सिजनको अन्तिम खेलमा अल–नासरले डामक फुटबल क्लबलाई ४–१ ले पराजित गर्दै सन् २०१९ यताकै पहिलो लिग उपाधि हात पारेको हो ।

४१ वर्षीय रोनाल्डोले उक्त खेलमा दुई गोल गर्दै टोलीलाई च्याम्पियन बनाउन महत्वपूर्ण भूमिका खेले । सन् २०२२ डिसेम्बरमा म्यान्चेष्टर युनाइटेड छाडेर साउदी अरब पुगेका रोनाल्डोलाई विश्व फुटबलकै ठूलो स्टारका रूपमा अल–नासरले अनुबन्ध गरेको थियो । क्लबका लागि उनले सबै प्रतियोगितामा १२९ गोल गरिसकेका छन् ।

यस उपाधिसँगै अल–नासरले आफ्नो ११औँ लिग ट्रफी जितेको छ भने रोनाल्डोले इंग्ल्यान्ड, स्पेन, इटालीपछि साउदी अरबमा पनि लिग उपाधि उचालेका छन् । यसअघि उनले रियल म्याड्रिड र युभेन्टस सँग पनि लिग उपाधि जितेका थिए ।

यस सिजनको उपाधि प्रतिस्पर्धा निकै रोमाञ्चक बनेको थियो । अल–हिलाल र अल–नासरबीचको मे १२ मा भएको खेललाई साउदी लिग इतिहासकै सबैभन्दा ठूलो खेल मानिएको थियो । उक्त खेल १–१ को बराबरीमा सकिएको थियो र उपाधि दौड अन्तिम दिनसम्म पुगेको थियो ।

रोनाल्डोको आगमनपछि साउदी लिगमा ठूला खेलाडीहरूको लहर सुरु भएको थियो । करिम बेन्जेमा, एनगोलो कान्टे, रियाद महरेज, साडियो माने र नेमार जस्ता स्टार खेलाडीहरू पनि साउदी क्लबहरूमा पुगेका थिए ।

तर सिजनभर विवाद पनि कम भएन । केही खेलाडीहरूले लिगले रोनाल्डो र अल–नासरलाई विशेष प्राथमिकता दिएको आरोप लगाएका थिए । यसबारे रोनाल्डोले भने, “सबैले गुनासो गर्ने वातावरण लिगका लागि राम्रो होइन” भन्दै प्रतिक्रिया दिएका थिए ।

यद्यपि उपाधि जितेसँगै रोनाल्डो र अल–नासरले साउदी फुटबल परियोजनाको सफलतालाई नयाँ उचाइमा पुर्‍याएको विश्लेषण गरिएको छ । अहिले भने रियाधको पहेँलो समर्थक समूह र रोनाल्डोका विश्वभरका समर्थक उत्सवमा डुबेका छन् ।