नाबालिकामाथि दुर्व्यवहार आरोपमा सांसद रेखा शर्मा पक्राउ

काठमाडौं । नेपाल कम्युनिष्ट पार्टी (एमाले) बाट लुम्बिनी प्रदेश सभा सदस्य रहेकी रेखाकुमारी शर्मालाई प्रहरीले पक्राउ गरेको छ । उनलाई सोमबार राति काठमाडौं उपत्यका अपराध अनुसन्धान कार्यालयको टोलीले धुम्बाराहीस्थित निवासबाट नियन्त्रणमा लिएको हो ।

शर्मामाथि दाङकी एक नाबालिकालाई घरेलु कामदारका रूपमा राखी शारीरिक तथा मानसिक हिंसा गरेको आरोप लाग्दै आएको थियो । उनी एमाले महासचिव शंकर पोखरेल निकट मानिन्छिन् ।

२०८१ जेठ १४ मा काठमाडौं महानगरपालिकाले बालुवाटारस्थित शर्माको घरबाट ती नाबालिकाको उद्धार गरेको थियो । उद्धारपछि कुटपिट, बाहिर निस्कन नदिएको, उचित बसोबास नदिएको र मानसिक यातना दिएको आरोप सार्वजनिक भएको थियो । यस विषयमा त्यसबेलाका मेयर तथा हालका प्रधानमन्त्री बालेन शाहले पनि चासो व्यक्त गरेका थिए ।

घटनापछि २०८१ जेठ ३० गते जिल्ला प्रहरी परिसर काठमाडौंमा उजुरी दर्ता गरिएको थियो । महानगरपालिकाले बालबालिकासम्बन्धी ऐन २०७५ अन्तर्गत बालबालिकाविरुद्ध हिंसाको कसुर भएको दाबी गरेको थियो, जसमा दोषी ठहर भए ५० हजार रुपैयाँसम्म जरिवाना र एक वर्षसम्म कैद सजाय हुन सक्ने प्रावधान छ ।

प्रारम्भिक उजुरीपछि पनि लामो समयसम्म पक्राउ नपरेको भन्दै बालेन शाहले सार्वजनिक रूपमा असन्तुष्टि जनाएका थिए । पछि २०८१ माघमा शर्माविरुद्ध मुद्दा नचलाउने निर्णय भए पनि उनले त्यसबेला सामाजिक सञ्जालमार्फत माफी माग्दै भविष्यमा सत्य बाहिर आउने संकेत गरेका थिए ।

यो प्रकरण सर्वोच्च अदालतसम्म पुगेको थियो । बालिकाका बुबाले बन्दी प्रत्यक्षीकरणको रिट दायर गरेपछि अदालतमा सुनुवाइ भएको थियो । प्रारम्भिक इजलासमा फरक राय आएपछि मुद्दा पूर्ण इजलासमा पठाइएको थियो ।

पूर्ण इजलासले अन्ततः बालिकालाई अभिभावकसँग पुनर्मिलन गराउने र उनको इच्छाअनुसार काठमाडौंमै राख्ने आदेश दिएको थियो । साथै, बालिका बालिग नहुँदासम्म शिक्षा र हेरचाहको जिम्मा काठमाडौं महानगरपालिकालाई दिने परमादेश जारी गरिएको थियो ।

हाल पुरानो मुद्दा पुनः सक्रिय भएसँगै सांसद शर्मा पक्राउ परेकी हुन् ।