श्रम संस्कृति पार्टीले टुङ्ग्यो समानुपातिक सांसदको नाम

काठमाडौं । श्रम संस्कृति पार्टीले समानुपातिकतर्फ सांसदका रूपमा अन्ततः चार जनाको नाम टुङ्ग्याएको छ । पार्टीका केन्द्रीय कोषाध्यक्ष समिता राईका अनुसार सिफारिस गरिने व्यक्तिहरूको निर्णय भइसकेको छ ।

निर्वाचनमा पार्टीले समानुपातिकतर्फ ३ लाख ८५ हजार ९०२ मत प्राप्त गरेको थियो । सो मतका आधारमा पार्टीले प्रतिनिधिसभामा समानुपातिकतर्फ चार जना सांसद पठाउने अवसर पाएको हो । तर चार सिट कसलाई दिने भन्ने विषयमा पार्टीभित्र केही समय तीव्र मतभेद देखिएको थियो ।

अन्ततः पार्टीले आदिवासी महिलातर्फ हेटौँडाकी मन्दिरा मोक्तान, खस–आर्य महिलातर्फ अम्बिका सङ्ग्रौला, दलित कोटाबाट सुर्खेतकी राधिका रम्तेल र आदिवासी जनजाति कोटाबाट पूर्व गोर्खा लाहुरे पूर्ण लिम्बूलाई समानुपातिक सांसदका लागि सिफारिस गर्ने निर्णय गरेको जनाएको छ ।

यसअघि समानुपातिक सूचीभित्रको विवादका कारण खस–आर्य समूहमा पहिलो नम्बरमा रहेका जीवन विष्टले आफ्नो नाम सूचीबाट फिर्ता लिएको घोषणा गरेका थिए । उनले पदका लागि विवाद गर्नुभन्दा त्यागको उदाहरण प्रस्तुत गर्न आफूले नाम फिर्ता लिएको बताएका थिए ।

समानुपातिक चयनलाई लिएर पार्टीभित्र चर्किएको विवादका क्रममा पार्टी अध्यक्ष हर्क साम्पाङले सामाजिक सञ्जालमार्फत असन्तुष्टि व्यक्त गरेका थिए । उनले ‘भात खाऊ, मेरो टाउको नखाऊ’ भन्दै अनावश्यक विवाद नगर्न चेतावनी दिएका थिए । साथै समानुपातिक विषयमा अनावश्यक हल्ला गर्नेहरूलाई पार्टीबाट निष्कासनसमेत गर्ने चेतावनी दिएका थिए ।

उक्त निर्वाचनमा श्रम संस्कृति पार्टीले प्रत्यक्षतर्फ तीन सिट जितेको छ । खोटाङ, भोजपुर र सुनसरी–१ बाट पार्टीका उम्मेदवार विजयी भएका थिए । समानुपातिकतर्फ पनि थ्रेसहोल्ड पार गर्दै पार्टीले राष्ट्रिय दलको मान्यता कायम राखेको छ ।