शेरबहादुर देउवा उपचारका लागि सिंगापुर प्रस्थान

काठमाडौं । पूर्वप्रधानमन्त्री तथा नेपाली कांग्रेसका पूर्वसभापति शेरबहादुर देउवा स्वास्थ्य उपचारका लागि सिंगापुर गएका छन् । स्रोतका अनुसार देउवा बुधबार सिंगापुर एयरलाइन्सको उडानमार्फत सिंगापुरतर्फ प्रस्थान गरेका हुन् । उनीसँग केही नजिकका सहयोगीसमेत सिंगापुर गएको बताइएको छ ।

पार्टीको विशेष महाधिवेशनबाट गगन थापाको नेतृत्वमा नयाँ कार्यसमिति चयन भएपछि देउवा सक्रिय राजनीतिबाट केही समययता टाढा देखिएका छन् । यसअघि जेनजी आन्दोलनका क्रममा देउवामाथि कुटपिट भएको थियो । सो घटनापछि उनले सिंगापुरमै उपचार गराएका थिए ।

आसन्न निर्वाचनमा देउवा उम्मेदवार नभएकोले पनि उनी चुनावअघि नै विदेश गएका हुन् । यसपटक डडेल्धुराबाट कांग्रेसको टिकट नैनसिंह महरले पाएका छन् ।