१३ वर्षीया छात्रामाथि जबर्जस्ती करणी आरोपमा शिक्षक पक्राउ

खोटाङ । जिल्लाको दिक्तेलस्थित दिक्तेल इंग्लिस सेकेण्डरी बोर्डिङ स्कुलमा अध्ययनरत १३ वर्षीया छात्रामाथि जबर्जस्ती करणी गरेको आरोपमा एक शिक्षक पक्राउ परेका छन् ।

सोलुखुम्बुको थुलुङ दुधकोसी गाउँपालिका–१ नेले घर भई सोही विद्यालयमा कार्यरत टेकबहादुर खत्रीलाई प्रहरीले पक्राउ गरेको हो । जिल्ला प्रहरी कार्यालय खोटाङका अनुसार फागुन ९ गते होमवर्क सिकाइदिने बहानामा शिक्षक खत्रीले छात्रालाई आफ्नै कोठामा बोलाएर जबर्जस्ती करणी गरेका थिए ।

घटनापछि करिब तीन घण्टासम्म बालिकालाई कोठामै थुनेर राखिएको पीडित परिवारले जनाएको छ । बालिका रुँदै घर पुगेपछि अभिभावकले घटनाबारे जानकारी पाएका थिए । त्यसपछि पीडितका बुवा र काका आरोपीको कोठामा पुगेर उनलाई नियन्त्रणमा लिई प्रहरीको जिम्मा लगाएका थिए ।

पीडित बालिकाको स्वास्थ्य परीक्षण गरिसकिएको छ । आरोपीविरुद्ध जबर्जस्ती करणी सम्बन्धी मुद्दा दर्ता गरी अनुसन्धान अघि बढाइएको जिल्ला प्रहरी कार्यालय खोटाङका सूचना अधिकारी प्रहरी निरीक्षक सुशान्त मिश्रले जानकारी दिए ।