काठमाडौंका विभिन्न क्षेत्रमा आज विद्युत् सेवा अवरुद्ध

काठमाडौं । नेपाल विद्युत् प्राधिकरणले आज काठमाडौंका विभिन्न स्थानमा मर्मत तथा पूर्वाधार सुदृढीकरण कार्यका कारण निर्धारित समयका लागि विद्युत् सेवा अवरुद्ध हुने जनाएको छ ।

प्राधिकरणका अनुसार बानेश्वर वितरण केन्द्र अन्तर्गत पर्ने सिनामंगल चोक र तिलगंगा क्षेत्रमा विद्युत् कटौती हुनेछ । तिलगंगा आँखा अस्पताल अगाडि रहेको एक पोल ढल्किएकोले त्यसलाई व्यवस्थित गर्न ११ केभी क्षमताको प्रसारण लाइन अस्थायी रूपमा बन्द गरिने जानकारी दिइएको छ ।

तिलगंगा, प्रकाश सन्यास आश्रम, सम्भुमार्ग, गौशाखा तथा विमानस्थल आसपासका क्षेत्रमा बिहान ११ बजेदेखि १२ः३० बजेसम्म विद्युत् अवरुद्ध हुनेछ । त्यसपछि तिनकुने, गैरीगाउँ, सिनामंगल र विमानस्थल क्षेत्रअन्तर्गतका स्थानमा दिउँसो १ बजेदेखि २ः३० बजेसम्म विद्युत् सेवा प्रभावित हुनेछ ।

यस्तै, महाराजगञ्ज वितरण केन्द्र अन्तर्गतका क्षेत्रमा पनि आज विद्युत् कटौती हुने भएको छ । काठमाडौं उपत्यकाको मध्य तथा उत्तर वितरण प्रणाली सुदृढीकरण आयोजनाअन्तर्गत वितरण लाइन भूमिगत गर्ने कार्य भइरहेकाले बिहान १० बजेदेखि दिउँसो २ बजेसम्म सेवा अवरुद्ध गरिने प्राधिकरणले जनाएको छ ।

बालुवाटार, शिवपुरी स्कुल, पाण्डोल मार्ग तथा प्रधानमन्त्री निवास आसपासका क्षेत्रमा बिहान १० बजेदेखि दिउँसो ३ बजेसम्म विद्युत् कटौती हुनेछ ।

त्यसैगरी हेपाली हाइट, च्यासिङडोल, देउराली जनता, भगवती मन्दिर, धापासी लगायतका स्थानमा पनि सेवा प्रभावित हुनेछ । वंशीधर मार्ग, चण्डोल, विशालनगर, सेन्ट्रल अपार्टमेन्ट र टुँडालदेवी मन्दिर क्षेत्रका उपभोक्ताले भने दिउँसो १२ बजेदेखि २ बजेसम्म विद्युत् अवरोधको सामना गर्नुपर्नेछ ।

विद्युत् अवरुद्धबाट हुन गएको असुविधाप्रति प्राधिकरणले उपभोक्तासमक्ष क्षमायाचना गर्दै मर्मत कार्य छिटो सम्पन्न गरी सेवा नियमित गरिने जनाएको छ ।