फोनिज काठमाडौं शाखाको २२औं साधारण सभा सम्पन्न

काठमाडौं । नेपाल आदिवासी जनजाति पत्रकार महासंघ (फोनिज) काठमाडौं शाखाले २२औं वार्षिक साधारण सभा शनिबार काठमाडौंमा सम्पन्न गरेको छ । काठमाडौंमा आयोजित कार्यक्रममा शाखाको सांगठनिक अवस्था, आदिवासी जनजाति पत्रकारका मुद्दा तथा भावी कार्यदिशाबारे छलफल गरिएको थियो ।

साधारण सभामा प्रमुख अतिथिका रूपमा उपस्थित फोनिज संघीय अध्यक्ष लक्की चौधरीले आदिवासी जनजाति पत्रकारहरूको माग र मुद्दाप्रति सरकार अझै गम्भीर नदेखिएको टिप्पणी गरे । उनले मातृभाषी पत्रकारहरूप्रति राज्यको दृष्टिकोण विभेदकारी रहेको उल्लेख गर्दै फोनिजले पाउँदै आएको सहयोग पनि ‘टोकन मनी’मै सीमित रहेको बताए ।

अध्यक्ष चौधरीले पत्रकारहरूको पेशागत सुरक्षा, हकहित र पहिचानका विषयमा सरकारको भूमिका कमजोर रहेको उल्लेख गरे । “पत्रकारहरूको पेशा सुरक्षा र हकहितको कुरा त अझै धेरै परको विषय बनेको छ,” उनले भने ।

उनले फोनिज काठमाडौं शाखाले मातृभाषामा लेख्न चाहने तथा लेखिरहेका पत्रकारहरूलाई प्रोत्साहन गर्नुपर्नेमा जोड दिए । साथै, उपत्यकामा देशभरिका आदिवासी जनजाति पत्रकारहरूलाई सक्रिय र चलायमान बनाउन शाखाले विशेष भूमिका खेल्नुपर्ने बताए । “हामी काठमाडौं शाखालाई सबैभन्दा सक्रिय र संगठित शाखाको रूपमा हेर्न चाहन्छौं, तर अहिले उपस्थिति निकै पातलो देखियो,” उनले चिन्ता व्यक्त गरे ।

अध्यक्ष चौधरीले नेपाली पत्रकारिताको इतिहास स्मरण गर्दै वि.सं. २००८ सालमा सत्यनारायण बहादुर श्रेष्ठले पत्रकार संघ स्थापना गरे पनि नेपाल पत्रकार महासंघले त्यसलाई मान्यता नदिएको प्रसंग उठाए । “जसले पत्रकारिता र पत्रकार महासंघको जन्म दिए, उसैलाई आज पहिचान मेटाएर साइड लगाउने काम भइरहेको छ,” उनले भने । यस विषयलाई फोनिजले आन्दोलनको एजेण्डाका रूपमा उठाउनुपर्ने धारणा पनि उनले राखे ।

उनले सत्य र न्यायको पक्षमा कलम चलाउने आदिवासी पत्रकारहरूबीच एकता र पहिचान मजबुत बनाउन आदिवासी समुदायका मुद्दामा अझ गहिरो खोजी पत्रकारिता आवश्यक रहेको बताए ।

कार्यक्रममा फोनिज काठमाडौं शाखाकी कोषाध्यक्ष दिपा सुनुवारले आर्थिक प्रतिवेदन प्रस्तुत गरिन् भने सचिव रत्नकाजी महर्जनले सांगठनिक प्रतिवेदन पेश गरेका थिए ।

साधारण सभाको अन्त्यमा फोनिज काठमाडौंका अध्यक्ष भीम लामाले विधानले दिएको अधिकार प्रयोग गर्न संघीय संरचनाका अवरोधका कारण समस्या भइरहेको गुनासो गरे । “हामी काम गर्न चाहँदा पनि विधान र फोनिज केन्द्रको दबाबका कारण अघि बढ्न सकेका छैनौं,” उनले भने । साथै, ती अवरोध फुकुवा गर्न संघीय अध्यक्षसँग तत्काल पहल गरिदिन आग्रह गरे ।

कार्यक्रममा विभिन्न वक्ताहरूले फोनिज काठमाडौं शाखाको आगामी यात्राका लागि शुभकामना मन्तव्य व्यक्त गरेका थिए ।