सुविसको वार्षिकोत्सवमा रक्तदान कार्यक्रम, सामाजिक सेवामा जोड

काठमाडौं । सुनुवार विद्यार्थी समाज (सुविस) ले आफ्नो २८औँ वार्षिकोत्सवको अवसरमा रक्तदान कार्यक्रम आयोजना गर्ने भएको छ । ‘रक्तदान, जीवनदान’ भन्ने नारासहित कार्यक्रम माघ १४ गते काठमाडौंको कोटेश्वरस्थित सुनुवार सेवा समाज (सुसेस) भवनमा हुने आयोजकले जनाएको छ ।

बिहान १०ः३० बजेदेखि दिउँसो २ः०० बजेसम्म सञ्चालन हुने उक्त कार्यक्रममा नेपाल रेडक्रस सोसाइटीको प्राविधिक सहयोग रहनेछ । रक्त संकलन, स्वास्थ्य परीक्षण तथा डोनर व्यवस्थापनलगायतका सम्पूर्ण प्राविधिक पक्ष रेडक्रसको सहकार्यमा सञ्चालन गरिने सुविसले जनाएको छ ।

कार्यक्रममार्फत युवाहरू, विद्यार्थी तथा सर्वसाधारणलाई सामाजिक सेवामा सक्रिय रूपमा सहभागी गराउने उद्देश्य राखिएको छ । रक्त अभावका कारण उपचारमा समस्या नहोस् भन्ने लक्ष्यसहित नियमित रूपमा यस्ता मानवीय कार्यक्रम आयोजना गर्दै आएको सुविसले यसपटक पनि व्यापक सहभागिताको अपेक्षा गरेको छ ।

सुविस अध्यक्ष मुस्कान सुनुवारका अनुसार, वार्षिकोत्सवलाई केवल औपचारिक कार्यक्रममा सीमित नराखी समाजका लागि प्रत्यक्ष लाभ पुग्ने गतिविधिसँग जोड्ने नीति लिइएको हो । “रक्तदान जस्तो जीवनरक्षक कार्यमार्फत समाजप्रतिको उत्तरदायित्व पूरा गर्न खोजेका छौँ । रक्तको अभावका कारण कसैले पनि ज्यान गुमाउन नपरोस् भन्ने हाम्रो मुख्य उद्देश्य हो,” उनले बताए ।

आयोजकले कार्यक्रममा स्वास्थ्य मापदण्डको पूर्ण पालना गरिने र पहिलोपटक रक्तदान गर्नेहरूका लागि समेत परामर्श तथा सहजीकरणको व्यवस्था गरिने जनाएको छ । साथै, कार्यक्रममा सहभागी भई रक्तदान गर्न इच्छुक सबैलाई समयमै उपस्थित भई यस मानवीय अभियानमा हातेमालो गर्न सुविसले आग्रह गरेको छ ।

सुविस सुनुवार सेवा समाजको भातृ संस्था हो ।