जोरपाटी ब्याडमिन्टन क्लबको स्थापना दिवसमा नगरस्तरीय खुल्ला तथा सुपर भेट्रान्स प्रतियोगिता आयोजना

काठमान्डु । जोरपाटी ब्याडमिन्टन क्लबको स्थापना दिवसको अवसरमा गोकर्णेश्वर नगरपालिका नगरस्तरीय खुल्ला तथा सुपर भेट्रान्स ब्याडमिन्टन प्रतियोगिता–२०८२ आयोजना हुने भएको छ । प्रतियोगिता पुस ३ देखि ५ गते शनिबारसम्म हुनेछ ।

गोकर्णेश्वर नगरपालिका–५, जोरपाटीस्थित जोरपाटी ब्याडमिन्टन क्लबको आयोजनामा हुन लागेको यस प्रतियोगिताले स्थानीय खेलाडीहरूलाई आफ्नो प्रतिभा प्रदर्शन गर्ने अवसर प्रदान गर्नुका साथै नगरस्तरमा ब्याडमिन्टन खेलको विकास र प्रवर्द्धनमा महत्वपूर्ण योगदान पुर्‍याउने आयोजकको विश्वास छ ।

खुल्ला तथा सुपर भेटान (५५+) विधामा सञ्चालन हुने प्रतियोगितामा गोकर्णेश्वर नगरपालिकाभित्रका विभिन्न क्लब तथा खेलाडीहरूको उल्लेख्य सहभागिता रहने अपेक्षा गरिएको छ । प्रतियोगितालाई सफल बनाउन स्थानीय समाजसेवी, खेलप्रेमी तथा सरोकारवालाहरूको सक्रिय सहयोग रहने आयोजक समितिले जनाएको छ ।

स्थापना दिवसको अवसरमा आयोजना गरिएको यस प्रतियोगिताले खेलकुदमार्फत सामाजिक एकता, स्वस्थ जीवनशैली र युवा तथा भेटान खेलाडीहरूलाई प्रेरित गर्ने उद्देश्य लिएको आयोजक जोरपाटी ब्याडमिन्टन क्लबले जानकारी दिएको छ ।