पत्नी हत्या गरी अलैँची बारीमा गाड्ने श्रीमान् पक्राउ

इटहरी । संखुवासभामा पत्नीको हत्या गरी शव गाडेको आरोपमा एक व्यक्ति पक्राउ परेका छन् । मादी नगरपालिका–६ का ४९ वर्षीय प्रेम दोर्ची शेर्पालाई प्रहरीले नियन्त्रणमा लिएको हो । उनीमाथि ३७ वर्षीया पत्नी मिना शेर्पाको हत्या गरेको आरोप छ ।

जिल्ला प्रहरी कार्यालय संखुवासभाका अनुसार मंसिर ९ गते प्रेम दोर्चीले पत्नी हराएको भन्दै प्रहरीमा निवेदन दिएका थिए । उक्त निवेदनपछि सुरु गरिएको खोजतलास र अनुसन्धानका क्रममा घटनामा उनकै संलग्नता शंकास्पद देखिएपछि प्रहरीले उनलाई नियन्त्रणमा लिएर सोधपुछ गरेको थियो ।

प्रहरीका अनुसार सोधपुछका क्रममा प्रेम दोर्चीले पत्नीको हत्या गरेको स्वीकार गरेका छन् । मंसिर ९ गते राति करिब साढे १० बजे ओखरेबोटे बजारबाट घर फर्किने क्रममा दुवैबीच विवाद भएको र विवाद चर्किँदै जाँदा बाटोमै कुटपिट गरी हत्या गरेको उनले बयान दिएका छन् ।

हत्या पश्चात् शवलाई त्रिपालमा बेरेर आफ्नै अलैँची बारीमा खाल्डो खनी गाडेको कुरा पनि अभियुक्तले स्वीकार गरेको प्रहरीले जनाएको छ । घटनाबारे थप अनुसन्धान भइरहेको र कानुनी प्रक्रिया अगाडि बढाइएको जिल्ला प्रहरीले जानकारी दिएको छ ।