काठमान्डुको सहज जित, चितवन ५३ रनले पराजित

काठमान्डु । नेपाल प्रिमियर लिग (एनपीएल) सिजन–२ अन्तर्गत शुक्रबार भएको पहिलो खेलमा चितवन राइनोज कमजोर ब्याटिङका कारण काठमान्डु गुर्खाजसँग ५३ रनले पराजित भएको छ ।

त्रिवि अन्तर्राष्ट्रिय क्रिकेट रंगशालामा टस जितेर १४३ रनको लक्ष्य पछ्याएको चितवन १७ ओभर १ बलमै ८९ रनमा समेटिँदै पराजित भयो । यो सिजनमा चितवनको यो दोस्रो हार हो । यसअघि उसले विराटनगर बोल्ट्स र कर्णाली याक्सलाई हराएको थियो भने लुम्बिनी लायन्ससँग पराजित भएको थियो ।

काठमान्डुको भने यो तेस्रो जित हो । यसअघि उसले लुम्बिनी लायन्स र जनकपुर रोयल्सलाई हराएको थियो भने विराटनगर बोल्ट्स र सुदूरपश्चिम रोयल्ससँग पराजित भएको थियो ।

चितवनको इनिङ सुरुवातदेखि नै ध्वस्त भयो । ओपनर दीपक बोहोरा पहिलो ओभरकै पाँचौँ बलमा शून्यमै आउट भए । दोस्रो ओपनर डेविड मलान पनि तेस्रो ओभरको पाँचौँ बलमा पाभेलियन फर्किए । पाँचौँ ओभरमा सैफ जैब, त्यसपछि देव खनाल आउट हुँदै टोली झन् संकटमा पर्‍यो ।

देव खनाल र रवि बोपाराले समान २१–२१ रन जोडे । सोहिल तानवीरले १८ रन थपे । अरू कसैले दोहोरो अंक पार गर्न सकेन । अघिल्ला तीन खेलमा लगातार अर्धशतक प्रहार गरेका बोपाराको ब्याट पनि आज चल्न सकेन ।

काठमान्डुका लागि रसिद खानले ३ विकेट लिए, जसमा रवि बोपाराको महत्वपूर्ण विकेट पनि समावेश छ । करण केसीले दीपक बोहोरा र सोहिल तानवीरलाई आउट गरे । मलिन्द कुमारले मलान र सैफ जैबलाई पर्भेलियन पठाए । सैब आलमले देव खनाल र कुशल मल्ललाई आउट गरे । सन्तोष यादवले १ विकेट लिए ।

चितवनको बलिङ भने लयमै देखियो । ४ ओभर २ बलमा काठमान्डु ३ विकेटका क्षतिमा २४ रनमै रोकिएको थियो । चौथो विकेटका लागि मिलिन्द कुमार र जोन सिम्पसनले ९८ रनको ठोस साझेदारी गर्दै काठमान्डुलाई खेलमा फर्काए ।

जोन सिम्पसनले ६० रनको अर्धशतक बनाए । मिलिन्दले ३८ रन जोडे । यिनै दुईको उत्कृष्ट साझेदारी काठमान्डुका लागि निर्णायक सावित भयो ।

चितवनका बलरले १९ ओभर ४ बलमै सबै विकेट झारेका थिए ।