कांग्रेसले आइतबार तीनै तहका पार्टी कार्यालय बन्द गर्ने

काठमाडौं । नेपाली कांग्रेसले पूर्वमन्त्री तथा पूर्वकेन्द्रीय सदस्य मोहम्मद आफ्ताब आलमको निधनप्रति श्रद्धाञ्जलीस्वरूप आइतबार देशभरका पार्टी कार्यालयहरू बन्द गर्ने निर्णय गरेको छ ।

शनिबार बसेको कांग्रेस केन्द्रीय कार्यसमितिको आकस्मिक बैठकले केन्द्रीय, प्रदेश र जिल्ला तहका पार्टी कार्यालयहरू बन्द गर्ने निर्णय गरेको मुख्य सचिव कृष्णप्रसाद पौडेलले जानकारी दिएका छन् ।

बैठकले आलमको निधनप्रति गहिरो दुःख व्यक्त गर्दै शोक प्रस्ताव पारित गरेको छ । साथै, शनिबारदेखि तीन दिनसम्म पार्टीका सबै कार्यालयमा झण्डा आधा झुकाउने र १३ दिनसम्म शोक पुस्तिका राख्ने निर्णय पनि गरिएको पौडेलले बताए ।

रौतहटका पूर्वसभापति समेत रहेका नेता आफ्ताब आलमको ६३ वर्षको उमेरमा काठमाडौंको सिनामंगलस्थित काठमाडौं मेडिकल कलेजमा उपचारका क्रममा शुक्रबार राति निधन भएको थियो ।