हङकङ सिक्सेस क्रिकेटः नेपालको भारतमाथि शानदार जित, दक्षिण अफ्रिकासँग पराजित

काठमाडौं । हङकङमा जारी हङकङ सिक्सेस क्रिकेट प्रतियोगितामा नेपालले भारतमाथि प्रभावशाली जित हात पारेको छ । शनिबार सम्पन्न खेलमा नेपालले भारतलाई ९२ रनले पराजित गर्दै उत्कृष्ट प्रदर्शन गरेको हो ।

पहिले ब्याटिङ गरेको नेपालले निर्धारित ओभरमा विना विकेट १३६ रनको विशाल योगफल बनायो । नेपालका लागि रशिद खानले ५५ रनको विस्फोटक इनिङ खेल्दा, सन्दीप जोराले ४७ रन र लोकेश रनले ३१ रनको योगदान दिए ।

जवाफी ब्याटिङमा उत्रिएको भारतको सुरुवात कमजोर रह्यो । लक्ष्य पछ्याउने क्रममा भारतले ३ ओभरमै सबै विकेट गुमाएर ४५ रनमा सिमित रह्यो ।

भारतका लागि भरत चिपली र प्रियांक पञ्चालले समान १२–१२ रन बनाए भने अन्य ब्याटर दोहोरो अंकमा पुग्न असफल रहे ।

बलिङतर्फ नेपालका रशिद खानले ३ विकेट, बसिर अहमदले २ विकेट, र रुपेश सिंहले १ विकेट लिए ।

दक्षिण अफ्रिकासँग पराजित
त्यस्तै आजै भएको खेलमा नेपाल दक्षिण अफ्रिकासँग ४ विकेटले पराजित भएको छ । मिसन रोड ग्राउन्ड मोङ कोकमा आज बिहान भएको खेलमा जितको लागि नेपालले दिएको ५९ रनको लक्ष्य पछ्याएको दक्षिण अफ्रिकाले ३ ओभर ४ बलमा २ विकेट गुमाएर पूरा गर्‍यो । उसका लागि ब्लेक सिम्पसनले सर्वाधिक ३० रन बनाए ।

नेपालका लागि लोकेश बमले २ विकेट लिए ।

त्यसअघि टस हारेर पहिले ब्याटिङको निम्तो पाएको नेपाल ३ ओभर ३ बलमा ५८ रनमा अलआउट भएको थियो । नेपालका लागि राशिद खानले सर्वाधिक १६ रन बनाए । लोकेश बमले १४ तथा आदिल आलमले १३ रन बनाए ।

दक्षिण अफ्रिकाका अब्दुल्लाह बायोमी, ब्लेक सिम्पसन र जोरिक भान साकवायकले समान २–२ विकेट लिए ।

योसँगै नेपालले प्रतियोगितामा लगातार दोस्रो हार बेहोरेको छ । यसअघि नेपाल पहिलो खेलमा अफगानिस्तानसँग पराजित भएको थियो ।