देशभर आंशिक बदली, पहाडी भूभागमा मेघगर्जनसहित वर्षाको सम्भावना

काठमाडौं । हाल देशभर मनसुनी वायूको प्रभाव कमजोर रही स्थानीय वायूको आंशिक प्रभाव सक्रिय रहेको मौसम पूर्वानुमान महाशाखाले जनाएको छ ।

आज दिउँसो देशको पहाडी भूभागमा सामान्य बदली रहनेछ भने बाँकी भूभागमा आंशिक बदलीको अवस्था देखिनेछ । कोशी, बागमती र गण्डकी प्रदेशका पहाडी क्षेत्रमा केही स्थानहरूमा र लुम्बिनी तथा कर्णाली प्रदेशका पहाडी भूभागमा थोरै स्थानहरूमा मेघगर्जन र चट्याङसहित मध्यम वर्षाको सम्भावना रहेको छ ।

साथै, कोशी र बागमती प्रदेशका पहाडी क्षेत्रका एक(दुई स्थानमा भारी वर्षा हुने सम्भावना पनि रहेको मौसमविद्हरूले बताएका छन्।

आज राति देशको पहाडी भूभागमा आंशिक बदली रहनेछ भने बाँकी भूभागमा मौसम मुख्यतः सफा रहनेछ । कोशी, बागमती र गण्डकी प्रदेशका पहाडी क्षेत्रका थोरै स्थानहरूमा तथा देशका अन्य पहाडी भागका एक(दुई स्थानमा मध्यम वर्षाको सम्भावना रहेको जनाइएको छ ।

मौसम पूर्वानुमान महाशाखाले सम्भावित भारी वर्षाका कारण पहिरो, बाढी तथा सवारी आवागमनमा अवरोध आउन सक्ने भएकाले सतर्कता अपनाउन सुझाव दिएको छ ।