आगजनीबाट क्षतिग्रस्त सरकारी संरचनाहरूको सरसफाइ तथा प्राविधिक परीक्षण सुरु

काठमाडौं । जेन जी आन्दोलनका क्रममा आगजनीबाट क्षतिग्रस्त भएका सरकारी संरचनाहरूको सरसफाइ र प्राविधिक परीक्षण सुरु गरिएको छ । ती संरचनाहरू प्रयोगमा ल्याउन सकिने वा नसकिने भन्ने निर्णय प्राविधिक परीक्षणपश्चात मात्र हुने जनाइएको छ ।

शनिबार रामशाहपथस्थित स्वास्थ्य तथा जनसंख्या मन्त्रालयको भवनमा सरसफाइ र प्रारम्भिक प्राविधिक परीक्षण सम्पन्न गरिएको छ । उक्त मन्त्रालयको भवन आन्दोलनका क्रममा आगलागीबाट पूर्णरूपमा क्षतिग्रस्त भएको थियो ।

नेपाल इन्जिनियर्स एशोसियसनका अध्यक्ष सुवासचन्द्र बरालका अनुसार मन्त्रालयको भित्तामा भने खास क्षति नपरे पनि स्ल्यावहरू पूर्णरूपमा क्षतिग्रस्त भएका छन् । यसले भवन पुनः प्रयोग गर्न जोखिमपूर्ण बनाएको उनले बताए ।

बरालले भवन निर्माण विभागको समन्वयमा एशोसियसनले ध्वस्त संरचनाहरूको प्रारम्भिक परीक्षण गरिरहेको जानकारी दिए । परीक्षणपछि संरचनालाई पुनर्निर्माण गर्ने उपायबारे सुझाव दिइने उनले स्पष्ट पारे ।

सिंहदरबार क्षेत्रका केही भवनहरू पुनः प्रयोग गर्न मिल्ने अवस्थामा रहेकामा केही भने अत्यन्त जोखिमपूर्ण अवस्थामा रहेको जनाइएको छ ।

त्यस्तै, सर्वोच्च अदालतको उत्तरतर्फको भवन पूर्णरूपमा क्षतिग्रस्त भएकाले प्रयोग अयोग्य रहेको र दक्षिणतर्फको भवनमा भने कम जोखिम देखिएको बताइएको छ ।

इन्जिनियर्स एशोसियसनले सबै संरचना प्राविधिक परीक्षणपश्चात मात्र प्रयोग गर्न सुझाव दिएको छ ।