जेनजी आन्दोलनमा ५१ को मृत्यु, हजारभन्दा बढी घाइते

काठमाडौं । भदौ २३ र २४ गते दुई दिन चलेको जेन जी पुस्ताको आन्दोलनका क्रममा मृत्यु हुनेको संख्या ५१ पुगेको नेपाल प्रहरीले जनाएको छ । मृतकमध्ये ३ जना प्रहरीसमेत छन् ।

प्रहरी प्रवक्ता डीआईजी विनोद घिमिरेका अनुसार अन्य क्षतिको विवरण संकलन भइरहेको छ । उनले भने, “अहिलेसम्म ३ जना प्रहरीसहित ५१ जनाको मृत्यु भएको पुष्टि भएको छ, थप विवरण संकलन हुँदैछ ।”

प्रदर्शनका क्रममा एक जना भारतीय महिला र ९ जना कैदीको ज्यान गएको छ भने बाँकेस्थित बाल सुधार गृहमा भएको झडपमा ५ जनाको मृत्यु भएको प्रहरीले जनाएको छ ।

यसैबीच, स्वास्थ्य तथा जनसंख्या मन्त्रालयले आन्दोलनका क्रममा घाइते भएका १,७७१ जनामध्ये १,३७९ जनाले उपचारपछि डिस्चार्ज पाएको र २८४ जना अझै अस्पतालमा भर्ना भएर उपचाररत रहेको जनाएको छ ।