यूएस ओपनः साबालेन्काको दुर्लभ दोहोरो उपाधि, एनिसिमोभा पराजित

काठमाडौं । विश्व नम्बर एक महिला टेनिस खेलाडी आर्यना साबालेन्काले अमेरिकी अमान्डा एनिसिमोभालाई हराउँदै यूएस ओपन महिला एकलमा लगातार दोस्रो पटक उपाधि जितेकी छन् । शनिबार भएको फाइनलमा शीर्ष वरीयताकी साबालेन्काले आठौं वरीयताकी एनिसिमोभालाई ६–३, ७–६(३) ले पराजित गरिन् ।

यससँगै साबालेन्का सन् २०१४ मा सेरेना विलियम्सपछि फ्लसिङ मेडोजमा लगातार दुई पटक एकल उपाधि जित्ने पहिलो महिला बनेकी छन् ।

२७ वर्षीया बेलारुसकी साबालेन्काले करिअरको १००औं ग्रान्ड स्लाम मुख्य ड्रको जित हासिल गरिन् । यस वर्ष उनले टुरमा ५६ जित जोड्दै अग्रस्थानमा छिन् । अघिल्ला दुई फाइनल (अष्ट्रेलियन ओपन र रोलेण्ड ग्यारेस) मा पराजय बेहोरेकी उनी यसपटक आफ्नो पहिलो ग्रान्ड स्लाम उपाधि जित्न सफल भइन् । यो उनको चौथो ग्रान्ड स्लाम उपाधि हो ।

उपाधि जितेपछि भावुक बनेकी साबालेन्काले भनिन्, “यसअघि दुई फाइनल हार्दा धेरै पीडादायी थियो । तर कडा परिश्रमपछि यो फाइनल जित्दा साँचो भावनाले भरिएको छु । यसपटक मैले आफ्नो भावनालाई नियन्त्रण गर्दै राम्रो खेल देखाउन सकेँ, त्यसैले गर्व छ ।”

एनिसिमोभाले यसअघि विहम्बल्डन फाइनलमा इगा स्वियाटेकसँग हार बेहोरेकी थिइन् । लगातार दुई ग्रान्ड स्लाम फाइनलमा हारसँगै उनी उपाधि जित्न असफल भइन् । तर यो प्रदर्शनपछि उनी डब्लुटिए र्‍याङ्किङमा पहिलोपटक शीर्ष पाँचमा प्रवेश गर्ने निश्चित भएको छ ।

यसअघि फ्रान्स ओपनमा कोको गफसँगको हारपछि साबालेन्का आलोचनामा आएकी थिइन् । त्यसबेलाको टिप्पणीका लागि उनले पछि माफी मागेकी थिइन् । उनले अनुभवलाई महत्वपूर्ण सिकाइको रूपमा लिएको बताउँदै भनिन्, “त्यो क्षणमा म अत्यन्त भावुक थिएँ । तर त्यसबाट सिकेर अझ बलियो भएकी छु ।”

साबालेन्का हालसम्म ४६ सातादेखि डब्लुटिए र्‍याङ्किङको शीर्ष स्थानमा छिन् । उनले अहिले अष्ट्रेलियन ओपन (२०२३, २०२४) र यूएस ओपन (२०२४, २०२५) गरी दुवै हार्ड कोर्ट ग्रान्ड स्लाममा दुई–दुई पटक उपाधि जितेर इतिहास रचेकि छिन् ।