संसदीय सुनुवाइ विशेष समितिको सभापतिमा खतिवडाको दाबी

काठमाडौं । नेपाली कांग्रेसका सांसद रामहरि खतिवडाले संसदीय सुनुवाइ विशेष समितिको सभापतिमा मनोनयन दर्ता गरेका छन् ।

खतिवडाले यसअघि राज्य व्यवस्था समितिबाट साउन २८ गते राजीनामा दिएका थिए । राजीनामा दिएलगत्तै उनलाई संसदीय सुनुवाइ समितिको सदस्य बनाइएको हो ।

उनी सभापतिका लागि उम्मेदवार बनेसँगै समितिमा नयाँ नेतृत्व चयनको प्रक्रिया सुरु भएको छ । सभापति चयन प्रक्रिया शुक्रबार बस्ने समितिको बैठकमार्फत टुंगो लगाइनेछ ।

यसअघि संसदीय सुनुवाइ समितिको सभापति इश्वरी न्यौपानेलाई राज्य व्यवस्था समितिमा स्थानान्तरण गरिएको थियो । न्यौपाने विगतमा खतिवडाले छाडेको पदमै गएका हुन् भने अहिले खतिवडालाई न्यौपानेले छाडेको स्थानमा ल्याउन लागिएको हो ।

यसरी दुई नेताबीच समितिको नेतृत्व अदला–बदलीको जस्तो परिदृश्य बनेको छ । संसदभित्र अब नेतृत्व चयनले सत्ता–प्रतिपक्षबीच थप राजनीतिक समीकरण ल्याउने अपेक्षा गरिएको छ ।