प्रतिनिधिसभाको बैठक बस्दै, विभिन्न विधेयकमाथि छलफलको कार्यसूची

काठमाडौं । प्रतिनिधिसभाको बैठक नयाँ बानेश्वरस्थित संघीय संसद् भवनमा बस्दैछ । आज अपराह्न १ बजे बैठकमा विभिन्न मन्त्रालयसँग सम्बन्धित मौखिक प्रश्नहरूको उत्तर दिने र महत्वपूर्ण विधेयकमाथि छलफल गर्ने कार्यसूची तय गरिएको छ ।

बैठकमा सञ्चार तथा सूचना प्रविधि, स्वास्थ्य तथा जनसंख्या, कृषि तथा पशुपन्छी विकास र ऊर्जा, जलस्रोत तथा सिँचाइ मन्त्रालयसँग सम्बन्धित मौखिक प्रश्नहरूको उत्तर सम्बन्धित मन्त्रीहरूले दिनेछन् ।

‘नेपाल पशु चिकित्सा परिषद् (पहिलो संशोधन) विधेयक, २०८२’ माथि विचार गरियोस् भन्ने प्रस्ताव सभामुखले निर्णयार्थ प्रस्तुत गर्नेछन् ।

‘बालबालिकासम्बन्धी (पहिलो संशोधन) विधेयक, २०८२’ लाई दफावार छलफलका लागि समितिमा पठाउने प्रस्ताव महिला, बालबालिका तथा ज्येष्ठ नागरिकमन्त्री नवलकिशोर साह सुडीले सदनमा पेश गर्ने कार्यक्रम छ ।

राष्ट्रपतिबाट सन्देशसहित फिर्ता भएको ‘संवैधानिक परिषद् (काम, कर्तव्य, अधिकार र कार्यविधिसम्बन्धी पहिलो संशोधन विधेयक, २०७९)’ माथि पुनर्विचार गरियोस् भन्ने प्रस्ताव प्रधानमन्त्री केपी शर्मा ओलीले सदनमा प्रस्तुत गर्ने कार्यसूची रहेको छ ।