डडेल्धुरामा जिप दुर्घटना, चार जनाको घटनास्थलमै मृत्यु

धनगढी । डडेल्धुराको नवदुर्गा गाउँपालिका–५ चौड नजिकैको कच्ची सडक खण्डमा बिहीबार बिहान जिप दुर्घटना हुँदा चार जनाले ज्यान गुमाएका छन् । से १ ज ७३८ नम्बरको जिप ठाडा बजारबाट सदरमुकामतर्फ आउँदै गर्दा सडकबाट करिब ५०० मिटर तल जंगलमा खसेको प्रहरीले जनाएको छ ।

जिल्ला प्रहरी कार्यालय डडेल्धुराका निमित्त प्रमुख प्रहरी निरीक्षक डम्बर विष्टका अनुसार घटनास्थलमै चार जनाको शव फेला परेको छ भने मृतकको पहिचान भने खुल्न बाँकी छ ।

दुर्घटनामा घाइते भएको आशंका गरिएका यात्रुहरूको उद्धार भइरहेको र उनीहरूलाई उपचारका लागि डडेल्धुरा अस्पताल पुर्‍याइएको प्रहरीले जनाएको छ ।

दुर्घटना बिहानीपख भएको घटनाको वास्तविक कारण खुलेको छैन ।