नेपाल इन्जिनियरिङ कलेजप्रति आकर्षण वृद्धि, प्रवेश परीक्षामा ४५० भन्दा बढीको सहभागिता

काठमाडौं । मुनाफारहित सामाजिक शैक्षिक संस्थाका रूपमा सञ्चालित नेपाल इन्जिनियरिङ कलेज (NEC) मा विद्यार्थिहरूको आकर्षण उल्लेख्य रूपमा बढ्दै गएको देखिएको छ । तीन दशकदेखि इन्जिनियरिङ शिक्षाको विकास र दक्ष जनशक्ति उत्पादनमा क्रियाशील रहेको कलेजले आगामी शैक्षिक सत्रका लागि लिएको प्रवेश परीक्षामा सहभागिता अत्यधिक देखिएको हो ।

शनिबार आयोजित स्नातक तहको प्रवेश परीक्षा दिँदा विज्ञान संकायका कक्षा १२ उत्तीर्ण ४५० भन्दा बढी विद्यार्थी सहभागी भएका छन् । कलेजका मिडिया रिलेसन अफिसर आशिष झाका अनुसार यो वर्ष प्रवेश परीक्षामा मोफसलबाट आएका विद्यार्थीको सहभागिता उल्लेख्य थियो । ‘इन्जिनियरिङ पढेर देशमै केही गर्ने चाहना बोकेका विद्यार्थीहरूको संख्या उत्साहजनक छ,’ उनले बताए ।

धादिङबाट छोरीलाई परीक्षा दिलाउन काठमाडौं आएका अभिभावक लक्ष्मण अधिकारीले कलेजको शैक्षिक वातावरण मन परेको बताए । उनका अनुसार रिसर्चमुखी शिक्षण प्रणाली, प्रयोगात्मक सिकाइ, सर्वसुलभ शुल्क र मुनाफा वितरण नगर्ने शैक्षिक मोडल कलेजको विशेषता हो ।

त्यस्तै, काठमाडौं सितापाइलाका अभिभावक अनन्त डाँगीले कलेजको शिक्षण शैली र सुविधाले नै आफूलाई छोएको बताए । ‘देशमै बसेर इन्जिनियरिङ पढ्दा भविष्य सुनिश्चित हुन सक्छ भन्ने सोचले छोरालाई यहाँ ल्याएँ,’ उनले भने ।

विद्यार्थीहरूले शहरी कोलाहलभन्दा टाढा, हरियालीयुक्त शान्त वातावरण, आफ्नै पूर्वाधार, विषयगत प्रयोगशाला, पुस्तकालय र एकेडेमिया–इन्डस्ट्री जोड्ने शिक्षण विधिका कारण आफूहरू आकर्षित भएको बताए । कलेजमा पूर्णकालिक फ्याकल्टी, राष्ट्रिय तथा अन्तर्राष्ट्रिय एक्सपोजर, छात्रवृत्ति र पहुँचयुक्त शुल्क संरचना उपलब्ध छ ।

नेपाल इन्जिनियरिङ काउन्सिलबाट मान्यता प्राप्त यो कलेज संस्था दर्ता ऐन २०३४ अन्तर्गत भक्तपुर जिल्ला प्रशासन कार्यालयमा दर्ता भएको हो । पछिल्लो समय शिक्षा मन्त्रालयद्वारा गठित सञ्चालक समितिमार्फत सञ्चालन हुँदै आएको कलेजले गरिब, जेहेन्दार तथा दूरदराजका विद्यार्थीसम्म इन्जिनियरिङ शिक्षाको पहुँच पुगोस् भन्ने उद्देश्य राखेको छ ।