बीपी राजमार्गमा अझै १५ दिन राति सवारी आवागमनमा निषेध

काभ्रेपलाञ्चोक । मनसुनजन्य जोखिम कायम रहेकाले बीपी राजमार्गमा रातको समयमा सवारी चलाउन प्रतिबन्ध थप १५ दिन लम्ब्याइएको छ । जिल्ला प्रशासन कार्यालय काभ्रेपलाञ्चोकका अनुसार भदौ १ गतेदेखि १५ गतेसम्म साँझ ५ बजेदेखि बिहान ५ बजेसम्म यात्रुवाहक र निजी सवारीसाधन सञ्चालन गर्न पाइने छैन ।

जिल्ला सुरक्षा समितिको शुक्रबार सम्पन्न बैठकले काभ्रेपलाञ्चोकको काभ्रेभञ्ज्याङदेखि सिन्धुलीको नेपालथोकसम्मको सडक खण्डमा रातको सवारी आवागमन स्थगित गर्ने निर्णय गरेको हो । उक्त सूचनामा मनसुन सक्रिय रहेकाले सम्भावित पहिरो र बाढीबाट हुने क्षति न्यूनिकरण गर्न उक्त समयसीमामा सतर्कता अपनाउन आग्रह गरिएको छ ।

सहायक प्रमुख जिल्ला अधिकारी सुदर्शन श्रेष्ठका अनुसार काभ्रेभञ्ज्याङ—खुर्कोट खण्डको धेरै स्थान जोखिममा रहेकाले उक्त निर्णय लिइएको हो । काठमाडौंतर्फबाट जाने सवारी साधन काभ्रेभञ्ज्याङमै रोकिनेछ भने प्रदेशतर्फ आउने सवारी नेपालथोकमा रोकिनेछ ।

यसअघि असार ७ गतेदेखि मनसुन सक्रिय भएसँगै उक्त राजमार्गमा साँझ ६ः३० देखि बिहान ५ बजेसम्म सवारी सञ्चालनमा रोक लगाइएको थियो । असार मसान्त र साउन महिनाभर यो समयावधि साँझ ५ बजेदेखि लागू गरिएको थियो ।

गत वर्ष असोजमा आएको बाढीपहिरोले काभ्रेपलाञ्चोकको चौकीडाँडादेखि सिन्धुलीको वर्षेखोलासम्म ८ किमि सडक बगाएको थियो । त्यसपछि अस्थायी रूपमा एकतर्फी वा दुइतर्फी आवागमन हुने गरी वैकल्पिक ट्र्याक प्रयोग भइरहेको छ । सिन्धुलीको खुर्कोटदेखि नेपालथोकसम्म ३४ किमा र नेपालथोकदेखि धुलिखेलसम्म ५० किमि गरी ८४ किमि सडक खण्ड सर्वाधिक क्षतिग्रस्त भएको थियो ।

चार खण्डमा बाँडी ठेक्का प्रक्रियाबाट स्थायी पुनर्निर्माण अघि बढाइएको उक्त राजमार्ग पूर्वी नेपालसँगको छोटो दुरीको महत्त्वपूर्ण सडक मार्ग हो, जहाँ दैनिक हजारौँ सवारी साधन चल्ने गर्छन् ।