भारतले नेपालबाट २०० मेगावाट थप विद्युत् आयात गर्ने

काठमाडौं । भारतले नेपालबाट विद्युत् आयातको मात्रा थप २०० मेगावाटले बढाउने अनुमति दिएको छ । यसअघि ८१०.९ मेगावाट विद्युत् आयातको स्वीकृति पाएको नेपाल अब कुल १०११ मेगावाट विद्युत् भारत पठाउन सक्ने भएको हो ।

नेपाल विद्युत प्राधिकरणका अनुसार, नयाँ स्वीकृत विद्युत् आपूर्ति ३१ अक्टोबर २०८२ सम्म रहनेछ । यसका लागि लिखु–२, लिखु खोला ए, लोअर सोलु, ठुलो खोला र सुपर काबेली खोलामा निर्मित जलविद्युत् आयोजनाबाट उत्पादन हुने बिजुली प्रयोग हुनेछ ।

नेपालले अहिले बंगलादेशलाई पनि ४० मेगावाट विद्युत् पठाइरहेको छ । यससँगै नेपालका लागि अनुमोदित विद्युत् निर्यात क्षमता १०५०.९ मेगावाट पुगेको छ ।

गत आर्थिक वर्षमा भारतलाई मात्र विद्युत् बिक्रीबाट नेपालले १७ अर्ब ४७ करोड रुपैयाँ आम्दानी गरेको थियो । प्राधिकरणका अनुसार, यस वर्ष थप स्वीकृतिले विद्युत् निर्यात आम्दानी झन्डै दोब्बर हुने अपेक्षा गरिएको छ ।

विशेषज्ञहरूका भनाइमा, यस कदमले नेपालको जलविद्युत् उत्पादन र निर्यात क्षमतामा वृद्धि गर्दै मुलुकको आर्थिक लाभमा महत्वपूर्ण योगदान पुर्‍याउनेछ ।