नेपालमा ‘अन्डरवर्ल्ड डन’ दाउद इब्राहिमका सहयोगी पक्राउ

काठमाडौं । अन्तर्राष्ट्रिय अपराधी सूचीमा रहेका दाउद इब्राहिमका एक नजिकका सहयोगी नेपालमा पक्राउ परेका छन् । पाँच दिनअघि राजधानी काठमाडौंबाट उनलाई प्रहरीले नियन्त्रणमा लिएको हो ।

भारतमा ‘मोस्ट वान्टेड’ को सूचीमा पर्ने शेख सलीम, जसलाई सलीम पिस्टल नामले चिनिन्छ, लामो समयदेखि आपराधिक गिरोहहरूलाई हतियार आपूर्ति गर्दै आएको बताइन्छ । उनी पहिचान लुकाएर काठमाडौंमा बस्दै आएका थिए ।

भारतीय प्रहरीले दिएको सूचनाको आधारमा नेपाल प्रहरीले निगरानी गर्दै पक्राउ अभियान चलाएको हो । नियन्त्रणमा लिएपछि उनलाई औपचारिक प्रक्रिया पूरा गरी भारतीय प्रहरीसमक्ष बुझाइएको बताइएको छ ।

दुई मुलुकबीचको आपसी समन्वयका कारण यस्ता संयुक्त कारबाही समय–समयमा हुने गरेका प्रहरी स्रोतले जनाएका छन् । भारतीय सञ्चारमाध्यमहरूले पनि सलीम भारतमा संलग्न विभिन्न अपराधका अभियोगसहित नेपालमा पक्राउ परेको पुष्टि गरेका छन् ।