‘कुलिङ अफ पिरियड’ विवादः छानबिन समितिको प्रतिवेदन सभामुखलाई बुझाइयो

काठमाडौं । संघीय निजामती सेवा विधेयकको दफा ८२ मा उल्लेख गरिएको ‘कुलिङ अफ पिरियड’ सम्बन्धी व्यवस्थामा भएको छेडछाडबारे छानबिन गर्न गठित विशेष संसदीय समितिले आफ्नो प्रतिवेदन सभामुख देवराज घिमिरेलाई बुझाएको छ ।

मंगलबार नयाँ बानेश्वरस्थित संसद् भवनको शंकर हलमा आयोजित कार्यक्रममा समितिका सभापति जीवन परियारले प्रतिवेदन सभामुख घिमिरेलाई हस्तान्तरण गरे ।

संघीय संसद् सचिवालयले उक्त प्रतिवेदन आजैको प्रतिनिधिसभा बैठकमा पेश गरिने कार्यसूची सार्वजनिक गरिसकेको छ ।

नेपाली कांग्रेसका सांसद परियार नेतृत्वको समितिले सो विधेयकमा गरिएको हेरफेरका विषयमा राज्य व्यवस्था तथा सुशासन समिति सभापति रामहरि खतिवडा र समिति सचिव सुरजकुमार दुरा नैतिक रूपमा जिम्मेवार रहेको ठहर गरेको छ ।