महामन्त्री शर्माको कडा टिप्पणीः प्रधानमन्त्रीकै दबाबमा विधेयक हतारिएको, सत्ता समीकरण अस्थिर हुन सक्ने

काठमाडौं । सत्तारुढ गठबन्धनका प्रमुख दल नेपाली कांग्रेसका महामन्त्री विश्वप्रकाश शर्माले प्रधानमन्त्री केपी शर्मा ओलीकै दबाबमा भूमिसम्बन्धी विधेयक हतारमा अघि बढाइएको आरोप लगाएका छन् ।

बीपी कोइरालाको ४३औँ स्मृति दिवसको अवसरमा बीपी विचार फाउण्डेसनले आयोजना गरेको ‘देश विकास र देशवासीको उन्नतिको आधार–बीपीको विचार’ विषयक कार्यक्रममा बोल्दै उनले भूमिसम्बन्धी विधेयकमा सहमति बिना बलपूर्वक अघि बढाइएको बताए ।

महामन्त्री शर्माका अनुसार भूमि व्यवस्था, सहकारी तथा गरिबी निवारण मन्त्रालयका मन्त्री बलराम अधिकारीले प्रधानमन्त्रीको निर्देशनमा अनावश्यक हतारो गरेका हुन् ।

उनले कांग्रेस एमालेसँगको गठबन्धनलाई चेक–ब्यालेन्सविहीन समर्थन मान्न नहुने स्पष्ट पारे । ‘गठबन्धन छ भन्दैमा जे ल्याए पनि आँखा चिम्लेर पारित गरिदिन्छौं भन्ने होइन,’ शर्माले भने, ‘विधेयक संसदबाट पारित हुनु अघि गम्भीर छलफल आवश्यक छ ।’

शर्माले निजामती सेवा सम्बन्धी विधेयकमा पनि असन्तुष्टि जनाए । राज्य व्यवस्था समितिबाट दुई वर्षे ‘कुलिङ पिरियड’सहित पारित भएको विधेयक संसदमा पुगेपछि संशोधनमार्फत त्यसलाई हटाइएको भन्दै उनले विरोध जनाए ।

‘समितिबाट पास भएको विधेयकलाई संसदमा आएर फेरबदल गर्नु आपत्तिजनक हो,’ शर्माले भने, ‘यदि यस्ता गतिविधि दोहोरिए भने सरकारको स्थायित्वमै प्रश्न उठ्न सक्छ ।’