काठमाडौंमा बसोबास गरिरहेका खिजीदेम्वाबासीका लागि तीन दिने एकीकृत सेवा शिविर सञ्चालन हुने

काठमाडौं । काठमाडौं उपत्यकामा बसोबास गरिरहेका ओखलढुंगाको खिजीदेम्बा गाउँपालिका क्षेत्रका नागरिकलाई लक्षित गरी एकीकृत सेवा शिविर सञ्चालन गरिने भएको छ । गाउँपालिकाको साउन १६ गते बसेको गाउँ कार्यपालिकाको बैठकले सो निर्णय गरेको हो ।

गाउँपालिकाबाट वडास्तरमा प्रवाह हुने विभिन्न सेवा सर्वसुलभ रुपमा उपत्यकामा नै उपलब्ध गराउन शिविर सञ्चालन गरिने भएको हो । यसले काठमाडौंमा रहेका खिजीदेम्वाबासीलाई सेवा लिन गाउँ फर्किनुपर्ने बाध्यता हट्ने जनाइएको छ ।

शिविर आगामी साउन २४, २५ र २६ गते विहान १० बजेदेखि शेर्पा पार्टी प्यालेस, चामुण्डा गेट, जोरपाटीमा सञ्चालन हुनेछ ।

शिविरमा व्यक्तिगत घटना दर्ता (जन्म, मृत्यु, विवाह, बसाइँसराइ र सम्बन्ध विच्छेद), सामाजिक सुरक्षा भत्ता सम्बन्धी सेवा दर्ता तथा नवीकरण, भूमि कर तथा मालपोत संकलन र वडा कार्यालयबाट प्रदान गरिने सबै प्रकारका सिफारिस पत्र सेवा उपलब्ध हुने छन ।

प्रमुख प्रशासकीय अधिकृत गौरवराज केसीद्वारा हस्ताक्षरित सूचनामा काठमाडौंमा रहेका खिजीदेम्वाबासी नागरिकलाई समयमै शिविरको जानकारी लिई आवश्यक कागजातसहित उपस्थित हुन गाउँपालिकाले अनुरोध गरेको छ ।