बागमती प्रदेश सरकारमा संकटः मन्त्री श्याम बहादुर खड्काको राजीनामा

हेटौँडा । बागमती प्रदेशका खानेपानी, ऊर्जा तथा सिँचाइमन्त्री श्याम बहादुर खड्काले मंगलबार पदबाट राजीनामा दिएका छन् । उनले मुख्यमन्त्री तथा नेपाली कांग्रेस संसदीय दलका नेता बहादुर सिंह लामासमक्ष राजीनामा पत्र बुझाएका हुन् ।

खड्काको राजीनामा कांग्रेसभित्र बढ्दो असन्तुष्टि र शक्ति सन्तुलनको संघर्षबीच आएको हो । संसदीय दलमा नेता लामाविरुद्ध दर्ता भएको अविश्वास प्रस्तावमाथि मत विभाजनको तयारी भइरहेका बेला उनले मन्त्री पद त्याग गरेका हुन् ।

राजीनामा दिएपछि खड्काले आफू अब सांसद इन्द्रबहादुर बानियाँको पक्षमा उभिएको स्पष्ट पारे । यद्यपि, उनले अविश्वास प्रस्तावमा हस्ताक्षर भने गरेका थिएनन् । उल्लेखनीय छ, २०७९ पुसमा दलको नेताका लागि भएको निर्वाचनमा उनले लामालाई समर्थन गरेका थिए ।

यससँगै, पछिल्ला दिनमा राजीनामा दिने कांग्रेसका मन्त्रीको संख्या ५ पुगेको छ । यसअघि गत शुक्रबार सहकारी मन्त्री मदुकुमार श्रेष्ठ, पर्यटन मन्त्री विमल ठकुरी, युवा तथा खेलकुद मन्त्री मीनकृष्ण महर्जन र आन्तरिक मामिला तथा कानुन मन्त्री सुरजचन्द्र लामिछानेले पनि पद त्याग गरेका थिए ।

राजीनामा दिएका सबै मन्त्रीहरूले बानियाँलाई समर्थन जनाइसकेका छन् । नेपाली कांग्रेसका बागमती प्रदेशमा ३७ सांसद छन् र बानियाँलाई दलको नेतृत्व गराउने तयारी तीव्र छ । अहिलेको घटनाक्रमले प्रदेश सरकारभित्र शक्ति सन्तुलन फेरिने सम्भावना बढेको छ ।