स्पेनलाई हराउँदै इंग्ल्यान्डले रच्यो इतिहास, बन्यो युरोपेली च्याम्पियन

स्वीजरल्यान्ड । ड्रामा, पुनरागमन र ऐतिहासिक जित— महिला युरो कप २०२५ को उपाधि अन्ततः इंग्ल्यान्डले आफ्नो पोल्टामा पार्न सफल भएको छ ।आइतबार राति स्वीजरल्यान्डमा सम्पन्न भएको रोमाञ्चक फाइनल खेलमा इंग्ल्यान्डले स्पेनलाई पेनाल्टी सुटआउटमा ३–१ ले पराजित गर्दै युरोपेली फुटबलमा आफ्नो दबदबा कायम राखेको हो ।

निर्धारित ९० मिनेटको खेल १–१ को बराबरीमा टुंगिएपछि निर्णयका लागि खेल पेनाल्टीमा धकेलिएको थियो। त्यसमा इंग्ल्यान्डकी गोलरक्षक हनाह हाप्टन नायिका सावित भइन् । उनले स्पेनका दुई प्रहारहरू शानदार ढंगले बचाइन् भने अर्को एक प्रहार पोस्ट बाहिर गएको थियो । इंग्ल्यान्डतर्फबाट अन्तिम निर्णायक पेनाल्टी चोल केलीले प्रहार गर्दै टिमलाई विजयी बनाइन् ।

स्पेनले लियो अग्रता, तर टिकाउन सकेन
खेलको सुरुवातदेखि नै आक्रामक देखिएको स्पेनले २५औँ मिनेटमा मारियो काल्डेन्टेलीको गोलमार्फत अग्रता बनाएको थियो । तर, त्यो खुशी धेरैबेर टिक्न सकेन । दोस्रो हाफको ५७औँ मिनेटमा केलीले बराबरी गोल गर्दै इंग्ल्यान्डलाई पुनः खेलमा फर्काइन् ।

त्यसपछि दुवै पक्षबाट केही राम्रो प्रयास भए पनि निर्णायक गोल आउन सकेन । तीव्र गति, सशक्त पासिङ र बलदबदाबीबीच खेल अतिरिक्त समयमा प्रवेश गर्‍यो तर त्यहाँ पनि निर्णायक क्षण सिर्जना हुन सकेन ।

इतिहास रच्ने प्रशिक्षक, अपराजित यात्रा
यो उपाधि इंग्ल्यान्डका लागि मात्र होइन, प्रशिक्षक सरिना विगम्यानका लागि पनि विशेष रह्यो । उनले लगातार तीन युरोपेली उपाधि जित्दै आफूलाई ‘महान् प्रशिक्षक’को सूचीमा उभ्याएकी छन् । अझ रोचक त के भने— उनले दुई फरक मुलुक (नेदरल्याण्ड्स र इंग्ल्यान्ड) लाई युरो जिताइसकेकी छिन् ।

यसै प्रतियोगितामा इंग्ल्यान्ड ‘कमब्याक क्विन’ सावित भएको छ । युरो २०२५ को सबै नकआउट खेलमा इंग्ल्यान्डले विपक्षीसँग पहिला गोल खाएर पनि अन्ततः जित निकालेको हो ।

विदेशी भूमिमा पहिलो उपाधि
इंग्ल्यान्डले यसअघि घरेलु मैदानमा युरो उपाधि जितेको थियो । तर, यो उपाधि विदेशमा जित्नु उनीहरूका लागि थप गौरवको क्षण बन्यो । विदेशी भूमिमा पहिलो पटक युरोपेली उपाधि जितेर इंग्ल्यान्डले आफ्नो फुटबल इतिहासमा नयाँ पृष्ठ थपेको छ । (एजेन्सी)