ज्येष्ठ नागरिकका मागबारे प्रचण्डको प्रतिबद्धताः “सक्दो पहल गर्छौं”

काठमाडौं । पूर्वप्रधानमन्त्री तथा माओवादी केन्द्रका अध्यक्ष पुष्पकमल दाहाल ‘प्रचण्ड’ले ज्येष्ठ नागरिकका समस्याहरू सम्बोधन गर्न आफ्नो पूर्ण सहयोग रहने स्पष्ट पारेका छन् ।

खुमलटारस्थित आफ्नै निवासमा बिहीबार ज्येष्ठ राष्ट्रिय नागरिक महासंघका पदाधिकारीहरूसँगको भेटमा उनले सो प्रतिबद्धता जनाएका हुन् ।

भेटका क्रममा महासंघले यातायातमा छुट, नागरिकता नपाएका ज्येष्ठ नागरिकहरूको पहिचान तथा व्यवस्थापन, वृद्धभत्ता वितरण प्रणाली सुधार, आर्थिक वर्गीकरणका आधारमा भत्ता दिने व्यवस्था, र राष्ट्रिय सभामा ज्येष्ठ नागरिकहरूको प्रतिनिधित्व सुनिश्चित गर्नुपर्ने माग राख्यो ।

महासंघले देशभर झण्डै २५ सय नागरिकताविहीन ज्येष्ठ नागरिक रहेको जानकारी दिँदै उनीहरू राज्यका सेवाबाट वञ्चित भएकोमा चिन्ता व्यक्त गर्‍यो । यस समस्याको समाधानको नेतृत्व लिन प्रचण्डलाई आग्रहसमेत गरिएको थियो ।

सुनिएको मागप्रति गम्भीर प्रतिक्रिया दिँदै अध्यक्ष प्रचण्डले भने, “तपाईंहरूको आवाज न्यायोचित छ । म व्यक्तिगत रूपमा र हाम्रो पार्टी संस्थागत रूपमा सक्दो पहल गर्नेछौं ।”

उनले माओवादी केन्द्रले ज्येष्ठ नागरिकप्रतिको दायित्वलाई प्राथमिकतामा राखेर आवश्यक कदम चाल्ने आश्वासनसमेत दिए ।